Jol-kólik oqıǵasyn jasaǵan BQO ákimdiginiń qyzmetkeri jumysynan bosatyldy

<p>ORAL. KAZINFORM - Batys Qazaqstan oblysy ákimi apparaty ishki aýdıt qyzmetiniń jetekshisi Erbol Naızabekov 2024 jyldyń qazan aıynda jol-kólik oqıǵasyn jasady.</p>

BQO ákiminiń baspasóz qyzmetinen málim etkenindeı, oblystyq polıtsııa departamenti oǵan qatysty QR Ákimshilik quqyq buzýshylyq kodeksiniń 608-babyna sáıkes ákimshilik is qozǵady. Tıisti saraptamalar taǵaıyndaldy.

- Tekserý qorytyndylaryna sáıkes is materıaldary sotqa joldanatyn bolady. Memlekettik qyzmetshilerdiń qyzmet etıkasy talaptaryn buzǵany úshin E.Naızabekov qatań sógis túrindegi tártiptik jaýapkershilikke tartyldy. Qazirgi kezde ol qyzmetinen bosatyldy, - dep habarlady vedomstvodan.

BQO polıtsııa departamenti baspasóz qyzmetiniń naqtylaýynsha, osy oqıǵa saldarynan jaraqat alǵan jábirlenýshi qyzdyń qanshalyqty zardap shekkenin anyqtaıtyn saraptama kelgennen keıin is sotqa joldanady.

Eske sala keteıik, budan buryn Batys Qazaqstanda polıtsııa qyzmetkeriniń avtokóligimen er adamdy qaǵyp óltirgenin jazǵan bolatynbyz.