Jol-kólik oqıǵasyn toqtataıyq: SQO-da polıtseıler men dárigerler túngi reıdke shyqty

PETROPAVL. QazAqparat – Soltústik Qazaqstan oblysynda polıtseıler jol-kólik oqıǵalarynyń aldyn alý maqsatynda medıtsına qyzmetkerlerimen birge túnde kólik júrgizýshilerdiń hal-jaǵdaıyn tekserdi, dep habarlaıdy QazAqparat tilshisi.

SQO polıtsııa departamenti baspasóz qyzmetiniń málimetinshe, álemdik tájirıbe kórsetkendeı, túngi joldaǵy apattarǵa kóbine júrgizýshiniń rýlde uıyqtap ketýi sebep. Júrgizýshilerdiń nazaryn osy máselege aýdarý úshin óńir polıtseıleri jedel járdem qyzmetiniń mamandarymen birge 24-28 mamyr aralyǵynda «Jol-kólik oqıǵasyn toqtataıyq» aktsııasyn ótkizdi.

Túngi reıd barysynda kólik júrgizýshileriniń sharshaý deńgeıi tekserildi. Qan qysymynyń, júrek soǵysynyń, satýratsııanyń buzylýy – sharshaǵandyqtyń belgisi. Osyndaı begiler Qostanaıdan Astanaǵa kókónis tasymaldap bara jatqan 36 jastaǵy «Mercedes» júk kóliginiń júrgizýshisinen anyqtaldy.

Onyń aıtýynsha, saǵat 6:00-de jolǵa shyqqannan tek bir jarym saǵat qana úzilis jasaǵan. Petropavl qalasy arqyly birinshi ret ótip bara jatqandyqtan, tártip saqshylary jol kórsetip, ony jaqyn mańdaǵy fýralar toqtaıtyn turaqqa jetkizdi.

«Tek bir túngi reıdtik is-sharada 30-dan astam júrgizýshi tekserildi. Aýyr júk kólikteriniń ǵana emes, jolaýshy tasymaldaýshy jáne jeńil kólikterdiń júrgizýshileri de nazarǵa alyndy. Budan bólek, medıtsına qyzmetkerleri dári qobdıshalaryn tekserdi. Jol qozǵalysynyń barlyq qatysýshylaryna eńbek pen demalys rejımin saqtaýdy eske salamyz. Qatty sharshaǵan kúıde kólik basqarýǵa múldem bolmaıdy. Jol júrisi qaǵıdalarynyń talaptaryn qatań saqtańyzdar», - deıdi SQO PD jergilikti polıtsııa qyzmeti basqarmasynyń bastyǵy Aıdyn Baımatov.

Jyl basynan SQO-da 64 jol-kólik oqıǵasy tirkelip, 5 adam kóz jumǵan, 108 adam jaraqattanǵan.