Jol kartasy aıasynda 207 myń adam jumysqa ornalastyryldy

NUR-SULTAN. QazAqparat - Jumyspen qamtýdyń 2020-2021 jyldarǵa arnalǵan jol kartasy (JQJK) aıasynda 6,7 myńnan astam jobany iske asyrý bastaldy, olarda 130 myń teńgelik ortasha jalaqymen 207 myń adam jumyspen qamtylǵan.

«JQJK ınfraqurylymdyq jobalaryn iske asyrý kezinde otandyq óndirýshilerdiń keminde 90 paıyzynyń taýarlary men qyzmetterin paıdalanýdy qamtamasyz etý erekshe shart bolyp otyr. Jumysshylardyń keminde jartysyn jumyspen qamtý ortalyqtary arqyly jaldaıdy, basymdyq jumyssyz jastarǵa beriledi. Merdigerler sanıtarlyq-epıdemıologııalyq sharalardy qoldana otyryp, qaýipsiz eńbek jaǵdaıyn qamtamasyz etýge tıis», - delingen Eńbek mınıstrligi málimetinde.

1 qarashadaǵy jaǵdaı boıynsha óńirlerde 6,7 myń joba turǵysynda jumys bastaldy, 207 myń jumys orny quryldy, onyń ishinde halyqty jumyspen qamtý ortalyqtary arqyly 112 myńnan astam jumys orny ashyldy.

Baǵdarlamaǵa qatysýshylardyń jartysy aýyl turǵyndary, 40 paıyzy – jastar jáne 7 paıyzy – tabysy az azamattar.

JQJK aıasynda jumyspen qamtylǵandardyń eń joǵary úlesi Shyǵys Qazaqstan (20,5 myń adam nemese 108,8%), Qyzylorda (9,4 myń adam nemese 101,2%) jáne Atyraý (7,3 myń adam nemese 102,9%) oblystarynda.

Buǵan deıin habarlanǵandaı, JQJK aıasynda barlyǵy 255 myń jumys ornyn ashý josparlanýda. Bul rette JQJK jobalary bolashaqta 100 myńnan astam turaqty jumys ornyn ashýǵa negiz bolady.