Jol erejesin 34 ret buzǵan semeıliktiń aıyppuly 1,2 mln teńgeden asty

SEMEI. QazAqparat – Semeı qalasynda 34 ret jol erejesin buzǵan kólik júrgizýshiniń aıyppuly 1,2 mln teńgeden asty, dep habarlaıdy QazAqparat tilshisi.

Abaı oblysy Polıtsııa departamenti baspasóz qyzmetiniń málimetine súıensek, tártip saqshylary 7 maýsymnan bastap «Boryshker» jedel-aldyn alý sharasyn júrgizgen. Aı sońyna deıin jalǵasqan sharanyń maqsaty – halyqty salynǵan ákimshilik aıyppuldardy ýaqtyly óteý qajettigi týraly habardar etý.

«Sonyń nátıjesinde, memleket bıýdjetine 3689 ákimshilik is boıynsha 40,7 mln teńge somasyna ákimshilik aıyppuldar óndirildi. Mamandandyrylǵan turaqtarǵa ótelmegen aıyppuldar úshin boryshkerlerdiń 247 kóligi ornalastyryldy. 5128 adam ákimshilik aıyppuldar boıynsha bereshekti óteý týraly habardar etildi», - delingen aqparatta.

Máselen, Semeıde «Sergek qorǵaý» qosymshasynyń kómegimen patrýldik polıtsııa qyzmetkerleri sheteldik esepte turǵan «Subaru» markaly kólikti toqtatty. Onyń júrgizýshisi jol erejesin 34 ret buzyp, 1 241 000 teńge somasyndaǵy aıyppuldy tólemeı júrgen. Quqyq buzýshynyń kóligi aıyppuldar tolyq ótelgenge deıin mamandandyrylǵan turaqqa ornalastyryldy.