Jol boıyndaǵy qyzmet kórsetý nysandarynyń qansha paıyzy normatıvke saı

ASTANA. QazAqparat – Búgin Májilistegi Úkimet saǵatynda Indýstrııa jáne ınfraqurylymdyq damý mınıstri Qaıyrbek Óskenbaev jol boıyndaǵy qyzmet kórsetý nysandaryna qatysty pikir aıtty, dep habarlaıdy QazAqparat tilshisi.

«Ulttyq standartqa sáıkes, tıisti nysandar qyzmet kórsetý sanatyna qaraı jol boıynda ornalasýy tıis. Árbir 50 shaqyrym saıyn «D» sanatyna jatatyn nysandar (onyń ishinde janar-jaǵar maı quıý stantsııalary, sanıtarlyq-gıgıenalyq toraptar, bólshek saýda), al árbir 250 shaqyrymda «A» sanattaǵy (barlyq qyzmet túrlerin qamtıtyn) nysandar ornalastyrylady. Respýblıkalyq jeli boıyndaǵy qyzmet kórsetý nysandarynyń sany keminde 1 900-ge jetýi tıis», - dedi Q. Óskenbaev.

Osy oraıda ol qazirgi kezde respýblıkalyq jeli boıynda 1 701 qyzmet kórsetý nysany ornalasqanyn aıtty. Onyń 69 paıyzy (1 174 nysan) normatıvtik jaǵdaıǵa sáıkes keledi.

«Bıyl jeke ınvestorlardy tartý esebinen 60-tan astam nysandy salý (janar-jaǵar maı quıý stantsııalary, sanıtarlyq-gıgıenalyq toraptar) jáne qoldanystaǵy shamamen 70 nysandy normatıvtik jaǵdaıǵa keltirý josparlanyp otyr. Bul joǵaryda kórsetilgen kórsetkishti 74 paıyzǵa deıin jetkizýge múmkindik beredi. Taldaýdyń nátıjesi boıynsha jáne normatıvtik talaptarǵa sáıkes, barlyq respýblıkalyq jelini qamtamasyz etý úshin shamamen 200 nysan salý qajet», - dedi mınıstr.

Buǵan deıin vedomstvo basshysy respýblıkalyq jeli boıynsha normatıvtik jaǵdaıǵa sáıkes keletin joldardyń úlesi – 90 paıyz, jergilikti jelide bul kórsetkish 80 paıyz shamasynda ekenin aıtty.