Jol boıyndaǵy ájethanalar qalaı ózgeredi
Ulttyq operator - «QazAvtoJol» kompanııasy avtomobıl joldary komıtetimen birige otyryp, 2022 jylǵa deıin demalys oryndarynda 304 sanıtarlyq torapty ornatý boıynsha baǵdarlama jasady. Bul baǵdarlamany QR Indýstrııa jáne ınfraqurylymdyq damý mınıstrligi bekitti.
«Qaıta jóndeýden ótip jatqan joldardyń boıynda – 110, paıdalanýǵa berilgen jol bólikterinde – 121, aqyly jol boıynda – 73 dárethana jasalady», - dedi kompanııadan.
Qaıta jóndeýden ótip jatqan joldardyń boıynda qazir 14 torap ornatylyp jatyr.
Onyń biri Şýchınsk – Zerendi ýchaskesinde ornatyldy. «Nur-Sultan – Pavlodar», «Jetibaı – Jańaózen», Qaraǵandy aınalma jolynda 11 torap qoıylyp jatyr. «Shymkent - Taraz» tas jolynda 2 torap ornatý úshin kelisimge qol qoıyldy.
Osy baǵdarlamany júzege asyrý maqsatynda 2019 jyldyń 21 qazanynda 40 ájethana ornatý jáne qyzmet kórsetý boıynsha ınvestıtsııalyq baıqaý jarııalanǵan bolatyn.
Qazir demalys alańdaryn qalpyna keltirý, elektr jelisin tartý, uńǵyma qazý jumystary atqarylyp jatyr. Elektr jelisi tartylmaǵan jerlerge balama elektr energııasy kózin ornatý kózdelgen.
Bul baıqaýǵa qatysýǵa «EUROmodul KZ», «Qazaqtech», «Ice Group KZ» JShS sekildi kompanııalardan ótinish tústi. Baıqaýdyń alǵashqy kezeńi boıynsha «Qazaqtech» JShS ınvestor atandy.
«Bul kompanııa ájethanalarǵa jasyl tehnologııa qaǵıdaty boıynsha vakkýmdy aǵyzý júıesi, kún energııasy júıesin ornatýmen aınalysady. Bul toraptardy ornatý ınvestor qarjysynyń esebinen bolady», - dedi «QazAvtojol» kompanııasynan.
Eske sala keteıik, 14 qarashada QR Prezıdenti Qasym-Jomart Toqaev týrızm salasyn damytýdaǵy kedergilerdi aıtqan bolatyn. Memleket basshysy Aqmola oblysynyń týrıstik múmkindigine shekteý qoıyp otyrǵan bir faktor retinde ájethanalardy tilge tıek etti.
«Eń qajetti degen jol boıyndaǵy dárethanalardy tártipke keltire almaı otyryp, servıs jaıynda qalaı aıtamyz?!», - degen bolatyn Prezıdent.