Jol boıynda talapqa saı dárethana ustaıtyn kásipkerlerge aı saıyn 83 myń teńge tólenedi

NUR-SULTAN. QazAqparat – Memleket jol boıynda talapqa saı dárethana ustaıtyn kásipkerlerge aı saıyn 83 myń teńge tólemekshi. Ol úshin jol boıynda dárethanadan bólek ózge de servıstik nysandar bolýy shart, dep habarlaıdy QazAqparat tilshisi.

Ortalyq kommýnıkatsııalar qyzmetinde ótken brıfııngide Týrızm ındýstrııasy komıtetiniń tóraǵasy Dastan Ryspekov osyndaı málimet berdi.

«Bárimiz jol boıyndaǵy dárethanalardyń sapasy syn kótermeıtinin kórip júrmiz. Indýstrııa jáne ınfraqurylymdyq damý mınıstrligi men oblystardyń ákimdikteri birlesip, 2019 jyly sanıtarııalyq-gıgıenalyq toraptarǵa túgendeý júrgizdi. Áli de sanıtarııalyq toraby bar 962 servıs nysany qajet», - deıdi Dastan Ryspekov.

Ol, sondaı-aq, qazir bul ispen «QazAvtoJol» kompanııasy ǵana bıýdjet esebinen aınalysyp júrgenin eske saldy.

«Ózderińiz biletindeı, «QazAvtoJol» sońǵy 2 jylda respýblıkalyq mańyzdaǵy joldardyń boıyna talapqa saı sanıtarlyq toraptar ornatyp jatyr. Al bul isti kásipker isteıtin bolsa, sanıtarlyq-gıgıenalyq torapty kútip ustaý úshin aı saıyn 83 myń teńge sýbsıdııa tólenedi. Bul oblystyq jáne aýdandyq mańyzy bar joldarǵa, týrıster jınalatyn negizgi oryndardaǵy jeke turǵan statsıonarlyq úı-jaılarǵa da, ózin-ózi aqtaýy tómen jol boıyndaǵy servıs obektilerine de qatysty bolady. Bul qarajat tehnıkalyq personaldy ustaý men qajetti jabdyqty satyp alý shyǵynyn azaıtady», - dedi komıtet tóraǵasy.