Jol boıynda kórsetiletin qyzmetter talapqa saı emes - vıtse-mınıstr
Aıta keteıik, búgin Ádilet mınıstrliginde Zań jobalaý qyzmeti máseleleri jónindegi vedomstvoaralyq komıssııanyń otyrysy ótti. Onda «Qazaqstan Respýblıkasynyń keıbir zańnamalyq aktilerine týrıstik qyzmet máseleleri boıynsha ózgerister men tolyqtyrýlar engizý týraly» zań jobasynyń tujyrymdamasy qaraldy.
«Búginde elimizde sapaly joldar salyndy, alaıda osy joldardyń boıynda tıisti servıs joq. Ókinishke qaraı, standarttarǵa saı dárethanalar ornatylmaǵan. Biz volonterlerdi shaqyryp, olardy elimizdiń aýmaǵyndaǵy osy qyzmet oryndaryn zerdeleýge jumyldyrdyq. Bul rette halyqaralyq sapaǵa sáıkes keletin dárethanalar eki jerde ǵana bar. Birinshisi jańadan salynǵan áýejaı termınalynda (Astana), al ekinshisi elordadaǵy jańa temirjol vokzalynda. Qazirgi kezde birlesip «KazWay» (jol boıyndaǵy servıstiń modýldik pavılony) tıptik jobalaryn qarap jatyrmyz. Ótkinishke qaraı, ol joba tolyǵymen qarastyrylmaǵan, oǵan ózgerister engizý kerek. Osy oraıda «Qazavtojol» kompanııasymen birlesip bul ózgeristerdi engizip jatyrmyz», - dedi Erlan Qojaǵapanov tilshilerdiń saýalyna jaýap bere otyryp.
Onyń sózine qaraǵanda, qazirgi kezde shetelden kelgen týrıster úshin jolda toqtaıtyn qajetti oryndar jabdyqtalmaǵan.
«Tıisti normalar bar, biraq ár el úshin olar ártúrli bolyp otyr. Biz Dúnıejúzilik týrıstik keńesi normalaryn ustanamyz, ıaǵnı 50 shaqyrymǵa bir dárethana ornatý eskerilgen. Alaıda olar óte sapaly salynýy kerek. Eń bastysy, ystyq sýmen qamtamasyz etken mańyzdy», - dep toqtaldy vıtse-mınıstr.
Qojaǵapanovtyń aıtýynsha, búginde jol boıyndaǵy janar-jaǵarmaı quıý stansalarynda dárethanalar qoıylǵan, alaıda olar oǵan jolaýshylardy ótkizbeıdi. Sebebi kez kelgen bıznes úshin dárethanany tolyqtaı jabdyqtaý shyǵyn keltiredi.
«Osy oraıda bıznes qandaı da bir qoldaýǵa súıenýi úshin memleket tıisti sýbsıdııalaýdy eskergenin usynýdamyz», - dedi ol.
Budan buryn habarlanǵandaı, bıyl shilde aıynda QR Premer-Mınıstri Baqytjan Saǵyntaev jol boıynda qyzmet kórsetý oryndaryn jaýapty «QazAvtoJol» ulttyq kompanııasynyń basshylyǵyn synaǵan bolatyn.