Jol aıryqtary, kópirler, mal ótkelderi. «Qyzylorda-Jezqazǵan» avtojoly jańǵyrtylady

NUR-SULTAN. QazAqparat - «Qyzylorda-Jezqazǵan» avtojoly jóndeletin boldy, dep habarlaıdy QR IIDM baspasóz qyzmeti.

Uzyndyǵy 427 shaqyrymdyq «Qyzylorda-Jezqazǵan» avtojolyn (Qyzylorda oblysy boıynsha – 218 shaqyrym, Qaraǵandy oblysy boıynsha – 209 shaqyrym) jańǵyrtý jumystary 2022-2024 jyldarǵa arnalǵan «Qýatty óńirler – el damýynyń draıveri» ulttyq jobalar tizbesine engizilgen.

Aıta ketý kerek, Qyzylorda oblysynyń aýmaǵy arqyly ótetin avtojol ýchaskesi boıynsha qazirgi ýaqytta konkýrstyq rásimder júrgizilýde. Kelisimshart jyl sońyna deıin jasalýy tıis.

Qaraǵandy oblysy boıynsha ótetin ýchaskege qatysty tıisti tehnıkalyq-ekonomıkalyq saraptamalar júrgizilip jatyr. Baıqaý qarasha aıynda jarııalanady dep josparlanǵan.

Jalpy joba Qyzylorda qalasyn aınalyp ótetin uzyndyǵy 15 shaqyrymdyq 4 jolaqty І tehnıkalyq sanatty aınalma jol salýdy, sondaı-aq uzyndyǵy 412 shaqyrymdyq ýchaskeni ІІ tehnıkalyq sanatta 2 jolaqty asfalt-beton jamylǵysymen qaıta jańartýdy qarastyrady.

Joba aıasynda 2 kólik aıyryǵyn, 6 kópir, 24 mal ótkelin, aýyl sharýashylyǵy tehnıkasyna arnalǵan ótpe joldardy, 150 sý ótkizý qubyrlaryn, kúrkeleri, estakadalary bar 12 demalys alańyn, 11 jyly sanıtarlyq-gıgıenalyq torap, eldi mekenderde jaryq ornatylatyn 2 jerústi jaıaý júrginshiler ótkelin salý josparlanýda.

Qaıta jańartýdan keıin kólikter úshin jyldamdyq saǵatyna 120 shaqyrymdy quraıdy.

Jalpy, tolyq aýqymdy qurylys jumystary kelesi jyly bastalady.

Jobany iske asyrý joldyń ótkizý qabiletin táýligine 7 myń kólikke deıin ulǵaıtýǵa múmkindik beredi. Sondaı-aq qurylys-montajdaý jumystary bastalǵanda 6 myńnan astam jańa jumys orny ashylady.