Joǵary bilimdi jastardyń 60 paıynda soft-skills daǵdysy joq -saraptamalyq alań

NUR-SULTAN. QazAqparat – Prezıdent joldaýyn iske asyrý boıynsha «JASTAR: ózekti másele» saraptamalyq alańy quryldy. Bul týraly QazAqparat tilshisi Aqparat jáne qoǵamdyq damý mınıstrligine silteme jasap habarlaıdy.

Búgin «JASTAR: ózekti másele» alańynyń alǵashqy saraptamalyq onlaın-otyrysy ótti. Onda Memleket basshysynyń jastar saıasatynyń ózekti máseleleri konteksindegi Joldaýdyń negizgi erejeleri, sondaı-aq ony iske asyrýdaǵy jańa tásilderi talqylandy. Іs-sharaǵa Aqparat jáne qoǵamdyq damý vıtse-mınıstri Ashat Oralov, QR Parlamenti Senaty apparaty basshysynyń orynbasary M. Spotkaı, QR Joǵarǵy Soty apparaty basshysynyń orynbasary N. Baıtilesov, «Atameken» QR Ulttyq kásipkerler palatasy Basqarma tóraǵasynyń orynbasary O. Ordabaev, QR Kásipodaqtar federatsııasy tóraǵasynyń orynbasary Q. Janabekov, «Nur Otan» partııasy Saıası menedjment mektebiniń dırektory Sh. Nurlanov, «Green TAL» áleýmettik sheberhanasynyń negizin qalaýshy E. Askerov, sondaı-aq ǵylymı qoǵamdastyq, ÚEU jáne «Jastar» ǴZO ókilderi qatysty.

Búgingi tańda qazirgi qoǵamnyń damý dınamıkasy tez jáne sapaly sheshimderdi talap etedi. «JASTAR: ózekti másele» alańyndaǵy ashyq dıalog formaty jastardy áleýmettik damytýdyń eń ózekti máselelerin tıimdi sheshýge múmkindik beredi. Tájirıbe almasý, saraptamalyq baǵalaý, odan ári is-qımyl júıesin qurý atalǵan pikirtalas platformasy jumysynyń nátıjesi bolýy kerek.

«Jastar máselesi árqashan mańyzdy memlekettik baǵyttardyń biri retinde, nazardan tys qalǵan emes. Memleket basshysy Qazaqstan halqyna Joldaýynda jastardy eńbekke baýlý, qorshaǵan ortany qorǵaý jáne qumar oıyndar men jeńil aqsha tabý sııaqty jastardy azdyratyn teris qumarlyqtan aryldyrý máselelerin kótergen bolatyn», - dep atap ótti vıtse-mınıstr Ashat Oralov.

Óz kezeginde «Atameken» QR Ulttyq kásipkerler palatasy Basqarma tóraǵasynyń orynbasary Oljas Ordabaev halyq arasyndaǵy kúrdeli jaǵdaıdy atap ótti.

«Mobıldik jumyspen qamtý ortalyqtaryndaǵy azamattardyń kópshiligi joǵary bilimi bar, biraq olardyń 60%-i soft-skills daǵdylaryna ıe bolmaǵandyqtan jumysqa ornalasýǵa múmkindigi joq», - dedi ol.

Sondaı-aq, búgingi tańda jastar mamandyq tańdaýdy bıznes prızmasy arqyly qarastyratynyn jáne «Atameken» UKP qyzmeti osy bıznesti damytýǵa baǵyttalǵanyn atap ótti.

«Green TAL» áleýmettik sheberhanasynyń negizin qalaýshy Emın Askerov óz sózinde áleýmettik kásipkerlikti damytý úshin jastardy jastar resýrstyq ortalyqtary arqyly belsendi túrde tartý qajet ekenin aıtty: «Qazir qalaı kóbirek alý kerektigin emes, qalaı kóbirek berý kerektigi týraly oılaný kerek. Búgingi tańda Qazaqstanda 250 áleýmettik kásipker bar jáne jas kásipkerler sanyn arttyrý úshin áleýmettik bıznes boıynsha konkýrstar uıymdastyrýdy qaıta bastaý qajet».

Ashyq talqylaýdy qamtamasyz etý úshin aldaǵy ýaqytta ártúrli saladaǵy sarapshylar, jas ǵalymdar, ǵylymı qoǵamdastyqtyń, ortalyq memlekettik jáne jergilikti atqarýshy organdardyń, úkimettik emes uıymdardyń ókilderi shaqyrylatyn bolady.