Joǵary bilimdi bıotehnolog sıntetıkalyq esirtki óndirip, saýdalaýmen aınalysqan

NUR-SULTAN. QazAqparat – «Qarasora-2021» jedel-aldyn alý is-sharalaryn júrgizý barysynda elorda polıtseıleri «Mefedron» jáne «Amfetamın» retinde belgili sıntetıkalyq esirtkilerdi óndiretin kezekti esirtki zerthanasyn anyqtady, dep habarlaıdy QazAqparat Nur-Sultan qalasy Polıtsııa departamentiniń baspasóz qyzmetine silteme jasap.

Esirtki zerthanasy men ony ári qaraı satýǵa arnalǵan ınternet-dúken elordanyń qymbat turǵyn úı keshenderiniń birindegi jaldamaly páterde ornalasqan.

«Óndiristi» uıymdastyrýshy 27 jastaǵy dıplomy bar bıotehnolog bolyp shyqty. Ol óziniń alǵan bilimin sıntetıkalyq esirtkilerdi óndirý men satýǵa qoldanǵan.

Tintý barysynda kúdiktiden sıntetıkalyq esirtkilerdi daıyndaý formýlalary jazylǵan dápter, elektrondy tarazy, psıhobelsendi zattardy óndirý úshin hımııalyq komponetter, psıhotroptyq zattar qatparlanǵan kolbalar, býyp-túıýge arnalǵan polıetılen paketteri, esirtki satýshy qoldanǵan derbes kompıýter, sonymen qatar 10 gramm satýǵa daıyn turǵan «sıntetık» anyqtalǵan.

Kúdikti esirtkilerdi óziniń jeke ınternet-dúkeni arqyly «baılanyssyz ádis» boıynsha satqan. Tapsyrysty orama retinde qoǵamdyq oryndarǵa, ortalyq saıabaqtarǵa, tipti balalar alańdaryna qaldyryp otyrǵan.

Osylaısha, jedel-tergeý sharalaryn júrgizý kezinde kúdikti elorda saıabaqtarynyń birinde polıtsııa qyzmetkerlerine oralǵan esirtkiler saqtalatyn jerlerge nusqaǵan.

Júrgizilgen operatsııa barysynda Esirtki qylmysyna qarsy is-qımyl basqarmasynyń qyzmetkerleri zańsyz aınalymnan sıntetıkalyq esirtkiniń 60 dozasyn tárkiledi.

Qazirgi kezde kúdikti qamaýǵa alyndy. Oǵan QR QK-niń 3-bólimi 297-baby «Esirtki quraldaryn, psıhotroptyq zattar men sol tektesterdi ótkizý maqsatynda zańsyz daıyndaý, qaıta óńdeý, ıemdený, saqtaý, tasymaldaý, jóneltý ne ótkizý» boıynsha aıyptaýlar usynyldy. Bul 15 jylǵa deıin bas bostandyǵynan aıyrýdy kózdeıtin bap jáne ol kináli adamnyń múlkin tárkileýdi qarastyrady.

Osy jyldyń basynan bastap bul – elordalyq polıtseıler anyqtaǵan ekinshi esirtki zerthanasy. Odan bólek, alty aıdyń ishinde zańsyz aınalymnan 45 kg túrli esirtki quraldary tárkilendi. Olardyń ishinde «geroın», «nasha», «marıhýana» jáne «sıntetıkalyq esirtkiler» bar. 12 qylmystyq is qozǵalǵan.

Bul jerde ólimge ákeletin zattardy satýmen aınalystan qylmyskerlerdi ustaýda azamattardyń kómegi bar ekenin aıta ketý kerek.

Osylaısha, jyldyń basynan bastap 51 turǵynnan esirtki satatyn ınternet-dúkenderdiń jarnamasy bar graffıtı sýretteri týraly habarlama (barlyǵy óshirilgen) kelip túsken.

Bul baǵyttaǵy jumystar jalǵasýda.