Joǵary bilim alam degen jastarǵa nesıe berý bastamasy óte ózekti – rektor

SEMEI. QazAqparat – D. Serikbaev atyndaǵy Shyǵys Qazaqstan tehnıkalyq ýnıversıtetiniń rektory, tehnıka ǵylymdarynyń kandıdaty Sáýle Jádigerqyzy Prezıdent Qasym-Jomart Toqaevtyń keshegi Joldaýyna qatysty pikir bildirdi, dep habarlaıdy QazAqparat tilshisi.

«Memleket basshysy kezekti Joldaýynda bilim, ǵylym jáne jastar taqyrybyna toqtalyp, birqatar máseleni kóterdi. «Jastarǵa jan-jaqty qoldaý kórsetý – memleketimizdiń basty mindetiniń biri. Eńbekpen qamtıtyn túrli sharalar arqyly kelesi jyly 100 myń jasqa jumys berýimiz kerek» dedi Qasym-Jomart Toqaev. Bul oraıda, D. Serikbaev atyndaǵy ShQTÝ-da túlekterdiń 96 paıyzy alǵan bilimi boıynsha jumysqa ornalasady. JOO baǵytynda kelesi jyldyń enshisine buıyratyn memlekettik granttyń berilý joly da aıqyndaldy. Bul týraly Prezıdent memleket UBT nátıjesi men ózge de kórsetkishterge baılanysty 30-dan 100%-ǵa deıin saralanatyn bilim granttaryn bólý josparlap otyrǵanyn jetkizdi», - deıdi Sáýle Jádigerqyzy.

Onyń aıtýynsha, Qasym-Jomart Kemeluly «El bolam deseń – besigińdi túze» degen ulaǵatty sózdiń tórkinine toqtalyp, «Jahandyq ǵylymı-tehnıkalyq progresti eskere otyryp, joǵary synyptarda jaratylystaný-matematıkalyq tsıkl jáne aǵylshyn tili pánderin oqytýdy kúsheıtý mańyzdy ekendigin jetkizdi.

«Prezıdenttiń joǵary bilimniń qoljetimdiligin qamtamasyz etý jaıly aıtqany óte ózekti. Osy rette oqýǵa jyldyq 2-3 paıyzben jeńildetilgen nesıe beriletindigi quba-qup. Sonymen qatar stýdentterdi jataqhanamen qamtamasyz etý máselesi de kóterilgeni kópti qýantyp otyr», - dedi rektor.