Joǵary aýdıtorlyq palataǵa jańa ókilettikter berý qajet

ASTANA. QazAqparat – Joǵary aýdıtorlyq palatanyń ókilettikteri men quzyretteriniń quqyqtyq shekarasy áli aıqyndalmaǵan. Bul týraly Májilistiń jalpy otyrysynda Joǵary aýdıtorlyq palatanyń tóraǵasy Natalıa Godýnova aıtty, dep habarlaıdy QazAqparat tilshisi.

«Mańyzdy resýrstardy óńirlik deńgeıge berý jáne anyqtalǵan júıeli problemalar Joǵary aýdıtorlyq palataǵa jańa ókilettikter berý, tekserý komıssııasynyń mártebesin arttyrý qajettigin kórsetedi. Konstıtýtsııalyq reforma aıasynda Esep komıteti Joǵary aýdıtorlyq palata bolyp qaıta qurylǵan sátten beri jarty jyldan astam ýaqyt ótti», - dedi palata tóraǵasy.

Onyń atap ótýinshe, Joǵary aýdıtorlyq palatanyń ókilettikteri men quzyretteriniń quqyqtyq shekarasy áli aıqyndalmaǵan.

«Atalǵan túzetýler - osy máseleni sheshýge jasaǵan úshinshi áreketimiz. Qazirgi ýaqytta zań jobasy Úkimettiń qorytyndysynda jatyr. Osy múmkindikti paıdalana otyryp, «Zańsyz ıemdengen aktıvterdi memleketke qaıtarý týraly» zań jobasy aýqymynda osy túzetýlerge bastamashylyq jasaǵany úshin Ekonomıkalyq reforma jáne óńirlik damý komıtetine alǵys aıtamyz», - dedi Natalıa Godýnova.