Joǵary ekstremaldy lastaný: Atyraýda kúkirtti sýtegi shekti mólsherden 97 ese asqan
Ákimniń aıtýynsha, jaýapty organdar 4 saǵattan soń aýa sapasyn zertteýge kirisken. Ol jaǵymsyz ıisti anyqtaý úshin qajetti sharalardy qolǵa almaǵan jaýapty organdardyń jumysyn synady.
Atyraý oblystyq ekologııa departamentiniń basshysy Álibek Bekmuhamedovtiń aıtýyna qaraǵanda, «Qazgıdromet» RMK óńirlik fılıaly usynǵan málimette 36 joǵary lastaný jáne 2 ekstremaldy joǵary lastaný deregi tirkelgen.
«Jaǵymsyz ıis qalanyń sol jaǵyndaǵy «Sasyqsaı» býlaný alańynan shyǵýy múmkin dep paıymdap otyrmyz. Munda atmosferalyq aýany joǵary lastaýshy ıngredıent ruqsat etilgen shekti kontsentratsııadan 10 ese asqan. Oǵan qosa, 24 naýryzda tańǵy saǵat 09:40-ta «Prıvokzalnyı» atmosferalyq aýa sapasyn baqylaý stantsııasynda kúkirtsýteginiń ruqsat etilgen shekti kontsentratsııadan 97 esege artyq ekeni tirkeldi Bul – ekstremaldy joǵary lastaný», - dedi Álibek Bekmuhamedov.
Al, «Qazgıdromet» RMK oblystyq fılıalynyń basshysy Salaýat Tólenovtiń aıtýynaa qaraǵanda, atmosferalyq aýanyń joǵary jáne ekstremaldy joǵary lastanýy týraly barlyq málimet Atyraý oblysy boıynsha ekologııa departamentine jáne jergilikti ýákiletti organdarǵa ýaqytyly berilip otyrǵan. Alaıda, Atyraý munaı óńdeý zaýyty men NCOC N.V kompanııalarynyń aýanyń lastanýyn tirkeıtin stantsııalary naýryzdyń 24-inen 25-ine qaraǵan túnde lastaný boıynsha derek bermegen.
«Tańǵy saǵat 03:00-den 07:00 aralyǵyndaǵy jaǵdaı týraly málimet berilgen joq. Biz Atyraý munaı óńdeý zaýyty mańyndaǵy turǵyn úıler ornalasqan aýdanyndaǵy atmosferalyq aýanyń sapasyna ólsheýler júrgizdik. Jel soltústik-shyǵystan soqty. «AMÓZ» JShS-niń oń jaǵyndaǵy qonystaný aımaǵynda kúkirtti sýtektiń mólsheri ruqsat etilgen shekti kontsentratsııadan 21-25 esege deıin asyp ketti. Bul – joǵary lastaný jaǵdaıy. Al, zaýyttyń sol jaǵyndaǵy qonystaný aımaǵynda bul derek 17,5 esege asyp, joǵary lastaný jaǵdaıy tirkeldi. Monıtorıng boıynsha derekter Atyraý oblysy boıynsha ekologııa departamentine jiberildi», - dedi Salaýat Tólenov.
Turǵyndar áleýmettik jelide kúkirttti sýtektiń ıisi NCOC N.V kompanııasynyń Qarabatan eldi mekenindegi zaýyty jaqtan shyqqany týraly shaǵym aıtty. Alaıda, konsortsıýmnyń eńbekti qorǵaý jáne qaýipsizdik jónindegi dırektory Ýálıhan Janaısovtyń aıtýynsha, buǵan kompanııanyń esh qatysy joq.
«Biz arnaıy sanıtarlyq qorǵaý aımaǵyna taldaý júrgizdik. Túngi saǵat 01:00-den tańǵy 09:00-ge deıin aýa sapasyn tekserdik. 24-25 naýryzda júrgizilgen tekserý nátıjesinde jeldiń basym baǵyty soltústik-batystan ońtústik-shyǵysqa, ıaǵnı kompanııanyń ken ornyna qaraı soqqan. Oǵan qosa, jeldiń jyldamdyǵy sekýndyna 2 metr bolǵan. Barlyq stantsııanyń deregin alyp, jaǵdaıdy baqylaýda ustap otyrmyz», - deıdi Ýálıhan Janaısov.
Atyraý oblysynyń ákimi Serik Shápkenovtiń pikirinshe, jaǵymsyz ıistiń shyǵý sebebin anyqtap, tıisti shara qoldaný úshin komıssııa qurylady. Al, atqarylyp jatqan jumystar týraly turǵyndarǵa jedel ári ýaqytyly aqparat berý qajet.
«Turǵyndar tarapynan aýanyń lastanýy týraly áleýmettik jelide aryz-shaǵymdar kóp aıtylady. Keshegi bolǵan jaıt quzyrly memlekettik organdardyń tıisti deńgeıde jumys atqarmaıtynyn kórsetti. Jaǵdaıǵa baılanysty dereý shara qabyldaýdyń ornyna tórt saǵatta áreń jınaldyq. Bizge turǵyndardyń taza aýamen demalyp, deni saý bolǵany qajet. Aýadaǵy jaǵymsyz ıis «Sasyqsaı» býlaný alańynan tarady deımiz. Biraq, biz onyń sýyn tazaladyq. Tipti flamıngo ushyp keldi degen aqparat shyqty. «Kvadrat» alańynda da tazartý jumystary júrip jatyr. Ondaǵy ıis aınalaǵa tarasa da qalany tolyq basýy múmkin emes. Sondyqtan, tıisti komıssııaǵa qajetti mamandardy qosý kerek. «Qazgıdromet» RMK fılıaly atmosferalyq aýa sapasyn baqylaıtyn stantsııalardan málimet jınap, taldaý jasaýǵa tıis. Sol jumystardyń negizinde aýany lastaǵan kinálilerge tıisti shara qoldaný kerek», - dedi Serik Shápkenov.
Eske sala ketelik, budan buryn Atyraýda aýadaǵy kúkirtti sýtegi shekti mólsherden asyp ketkenin habarlaǵan edik.
Keıin kúkirtti sýtegi shekti mólsherden 25 esege asqany anyqtaldy.