Joǵary deńgeıde óńdelgen ónim shyǵaratyn klasterge kiretin jobalar qandaı

<p>ASTANA. KAZINFORM — Joǵary deńgeıde óńdelgen ónim shyǵaratyn klaster qurýǵa baǵyttalǵan 17 iri jobany iske asyrý nátıjesinde 24 myńnan astam jańa jumys orny qurylady. Bul jaıynda Májilis depýtattarynyń saýalyna Premer-Mınıstr Oljas Bektenovtiń jaýabynda aıtylǵan.</p>

— Memleket basshysynyń 2023 jylǵy 1 qyrkúıektegi «Ádiletti Qazaqstannyń ekonomıkalyq baǵdary» atty Qazaqstan halqyna Joldaýynda Úkimetke basym baǵyttarda, onyń ishinde metaldardy tereń óńdeý, munaı, gaz jáne kómir hımııasy, mashına jasaý, avtokomponentter men tyńaıtqyshtar shyǵarý, týrızm salasy jáne taǵy basqa joǵary deńgeıde óńdelgen ónim shyǵaratyn klaster qurýǵa baǵyttalǵan keminde 15 iri jobanyń tizbesin bekitý mindeti qoıyldy, — dep atap ótedi Premer-Mınıstr jaýabynda.

Oljas Bektenovtiń dereginshe, ol úshin Úkimet mynadaı jobalardyń tizbesin jasady:

1) metallýrgııalyq klaster (Pavlodar oblysy), «Mineral Product International» JShS, ınvestıtsııa kólemi — 228,5 mln dollar, 526 jumys ornyn qurý, iske qosý merzimi — 2026 jyl;

2) ystyqtaı brıkettelgen temir óndirý zaýyty (Qostanaı oblysy), «SSKÓB» AQ (ERG), ınvestıtsııa kólemi — 1 mlrd dollar, 500 jumys ornyn qurý, iske qosý merzimi — 2028 jyl;

3) Qarmet zaýytyn jańǵyrtý (Qaraǵandy oblysy), «Qazaqstan Steel Group» JShS, ınvestıtsııa kólemi — 3,5 mlrd dollar, aıaqtaý merzimi — 2028 jyl;

4) mys balqytý zaýyty (Abaı oblysy), «KAZ Minerals Smelting»/NFC» JShS, ınvestıtsııa kólemi — 1,3 mlrd dollar, 1083 jumys ornyn qurý, iske qosý merzimi — 2028 jyl;

5) Quramynda altyny bar joǵary kómirtekti sýlfıdti kontsentrattardy qaıta óńdeıtin «Ertis gıdrometallýrgııalyq kombınaty», Solidcore Resources, ınvestıtsııa kólemi — 978 mln dollar, qurylys barysynda 1 myńnan asa jumys orny, sondaı-aq 500 turaqty jumys orny qurylady, iske qosý merzimi — 2028 jyl;

6) býtadıen jáne onyń týyndylaryn shyǵaratyn zaýyt (Atyraý oblysy), «Býtadıen» JShS, ınvestıtsııa kólemi — 900 mln dollar, 750 jumys ornyn qurý, iske qosý merzimi — 2028 jyl;

7) polıetılentereftalat óndiretin zaýyt (Atyraý oblysy), «KMG PetroChem» JShS, ınvestıtsııa kólemi — 1,5 mlrd dollar, 800 jumys ornyn qurý, iske qosý merzimi — 2029 jyl;

8) Integratsııalanǵan gaz-hımııa kesheni — gaz separatsııalyq keshenniń qurylysy boıynsha jobany iske asyrýmen ekinshi kezeń (polıetılen) (Atyraý oblysy), «Sılleno» JShS/«KMG PetroChem» JShS, ınvestıtsııa kólemi — 9,7 mlrd dollar, 938 jumys ornyn qurý, iske qosý merzimi — 2029 jyl;

9) Shymkent MÓZ-niń 2-shi kezegin salý (Shymkent q.), «QazMunaıGaz» UK» AQ, ınvestıtsııa kólemi — 5 mlrd dollar, 1200 jumys ornyn qurý, iske qosý merzimi — 2030 jyl;

10) ammıak jáne karbamıd óndiretin zaýyt (Mańǵystaý oblysy), «KazAzot Prime» JShS, ınvestıtsııa kólemi — 1,5 mlrd dollar, 700 jumys ornyn qurý, iske qosý merzimi — 2028 jyl;

11) kalıı tuzdaryn óndiretin baıytý-óndiristik kesheni (Batys Qazaqstan oblysy), «Qazaq Kalium Ltd» JK, ınvestıtsııalar kólemi: 1-kezeń — 1,25 mlrd dollar, 2-kezeń — 1 mlrd dollar, 3-kezeń — 1 mlrd dollar, 4900 jumys ornyn qurý, birinshi kezeńdi iske qosý merzimi — 2027 jyl, ekinshi kezeń — 2030 jyl, úshinshi kezeń — 2035 jyl;

12) KIA avtomobılderin shyǵaratyn zaýyt (Qostanaı oblysy), «KIA Qazaqstan» JShS, ınvestıtsııa kólemi — 191,5 mln dollar, 1500 jumys ornyn qurý, iske qosý merzimi — 2025 jyl;

13) Qytaı avtomobılderiniń shyǵaratyn mýltıbrendti zaýyt (Almaty q.), «Astana Motors Manufacturing Kazakhstan» JShS, ınvestıtsııa kólemi — 387 mln dollar, 3600 jumys ornyn qurý, iske qosý merzimi — 2025 jyl;

14) kópfýnktsıonaldy týrıstik aýdan (Astana q.), «Ellington Group Kaz Ltd.», ınvestıtsııa kólemi — 412 mln dollar, 2000 jumys ornyn qurý, iske qosý merzimi — 2026 jyl;

15) Aqtaý q. «jyly jaǵajaıdy» keshendi damytý (Mańǵystaý oblysy), Bazis-A, BI Group, FTG Group (Sembol) Tethys Aktau, ınvestıtsııa kólemi — 292 mln dollar, 5000 jumys ornyn qurý, iske qosý merzimi — 2026 jyl;

16) bıdaı men burshaqty tereń óńdeıtin ıntegratsııalanǵan agroónerkásiptik keshen (Astana q.), Tiryaki Agro (Túrkııa)/Hassad Food (Qatar), ınvestıtsııa kólemi — 400 mln dollar, 400 jumys ornyn qurý, iske qosý merzimi — 2026 jyl;

17) bıdaı dánin tereń óńdeý zaýyty (Qostanaı oblysy), «Qostanai Grain Industry» JShS, ınvestıtsııa kólemi — 149 mln dollar 650 jumys ornyn qurý, iske qosý merzimi — 2027 jyl.

— Іrikteý kezinde ortasha jáne joǵary deńgeıde óńdelgen ónim shyǵarý krıterııleri, eksport pen ımportty almastyrýǵa baǵdarlaný, naryqtaǵy suranys, strategııalyq mańyzdylyǵy (mýltıplıkatıvti áser) eskerildi. Jobalardyń jalpy quny 14 trln teńgeden asady, qarjylandyrý kózderi — jeke ınvestıtsııalar jáne qaryz qarajaty. Bul rette respýblıkalyq bıýdjetten qarjylandyrý jobalardyń ázirligine qaraı tek qajetti ınjenerlik-kommýnıkatsııalyq ınfraqurylymdy jetkizý úshin ǵana qaralatyn bolady. Bul jobalar tolyq qýatyna shyqqan kezde 24 myńnan astam jumys orny qurylyp, eksport 6 trln teńgeden astam somaǵa ulǵaıady, ımportty almastyrý jyl saıyn 1,5 trln teńgeden asady. Jumystardyń barysyna tıisti baqylaýdy qamtamasyz etý úshin árbir joba boıynsha iske asyrýdyń egjeı-tegjeıli josparlary bekitildi. Olardyń monıtorıngi Investıtsııalyq shtab aıasynda júzege asyrylýda, — dedi Úkimet basshysy.

Eske salsaq, buǵan deıin Úkimet Jezqazǵannyń jylý jelilerin jańǵyrtýǵa rezervten 1,5 mlrd teńge qarjy bólgeni týraly jazdyq.