Joǵary aýdıtorlyq palata: Óńirlik tekserý komıssııalary taratylady
Negizgi ózgeris 2026 jylǵy 1 qańtardan bastap óńirlik tekserý komıssııalaryn taratyp, Joǵary aýdıtorlyq palatanyń aýmaqtyq departamentterin qurý bolmaq. Bul múddeler qaqtyǵysyn boldyrmaýǵa múmkindik beredi, sebebi búginde tekserý komıssııalary jergilikti bıýdjetterden qarjylandyrylady, al bul júrgiziletin aýdıtterdiń obektıvtiligine áser etýi múmkin.
Bul rette jergilikti ózin-ózi basqarýdyń mańyzdy róli saqtalyp qalady.
Máselen, máslıhat depýtattary Joǵary aýdıtorlyq palatanyń tıisti aýmaqtyq departamenti basshylyǵynyń eki ókilin taǵaıyndaı alady.
Olar sondaı-aq jergilikti bıýdjettiń atqarylýy jónindegi qorytyndyny jáne óńirdiń ózekti problemalary boıynsha aýdıt qorytyndylaryn tyńdaýǵa, aýdıt júrgizýdiń jyl saıynǵy josparyna óz usynystaryn engizýge quqyly.
Jalpy Joǵary aýdıtorlyq palatanyń óńirlik departamentteriniń máslıhattarmen ózara is-qımylyn búginde qoldanylyp júrgen «Joǵary aýdıtorlyq palata – Parlament» modeli boıynsha qurý josparlanýda.
«Memleket basshysy memlekettik aýdıt júıesin reformalaý týraly bastamaǵa qoldaý bildirdi, bul onyń tıimdiligin edáýir arttyrýǵa múmkindik beredi. Reformalar toptamasyn iske asyrý barlyq ınstıtýtsıonaldyq jáne uıymdastyrýshylyq máselelerdi jan-jaqty pysyqtaýdy talapetedi», — dep atap ótti Álıhan Smaıylov.
Sondaı-aq memlekettik aýdıtor biliktiligin alýǵa úmitker kandıdattardy biryńǵaı emtıhannan ótkizýdi Joǵary aýdıtorlyq palatanyń quzyretine berý josparlanyp otyr, bul óz kezeginde memlekettik aýdıt organdarynyń kadrlyq áleýetin arttyrýǵa múmkindik beredi. Birqatar basqa da sharalar kózdelýde.
Joǵary aýdıtorlyq palatanyń apparat basshysy Qundyzbek Ábdirasylov búgingi tańda 47 tarmaqtan turatyn Jol kartasy ázirlenip, iske asyrylyp jatqanyn, memlekettik aýdıt reformasyn iske asyrý jónindegi naqty is-sharalar, olardy oryndaý merzimderi jáne jaýapty adamdar aıqyndalǵanyn atap ótti.