Joǵarǵy sottyń otyrystary budan bylaı onlaın rejimde ótetin boldy

ASTANA. QazAqparat - Qazaqstan Respýblıkasy Joǵarǵy sotynyń jalpy otyrystary budan bylaı ashyq formatta, ıaǵnı onlaın rejimde ótkiziletin boldy. Bul týraly búgingi Joǵarǵy sottyń jalpy otyrysynda QR Joǵarǵy Sot Tóraǵasy Jaqyp Asanov málim etti, dep habarlaıdy «QazAqparat» HAA tilshisi.

«Bul jalpy otyrysymyzdyń bir ereksheligi bar. Biz alǵash ret otyrysymyzdy onlaın rejimde ótkizip otyrmyz. Onlaın túrde kóre almaǵandar úshin otyrystyń jazbasyn saıtqa ornalastyramyz. Jalpy, bárimizge belgili, Konstıtýtsııaǵa sáıkes, Qazaqstanda memlekettik bılik úshtarmaqtan turady. Sonyń biri - sot bıligi. Parlament pen Úkimetti alar bolsaq, olardyń jalpy otyrystary qoǵamǵa ashyq túrde ótkiziledi. Sondyqtan, Joǵarǵy sotta búginnen bastap mańyzdy máselelerdi qaraǵanda jalpy otyrysymyzdy ashyq formatta ótkizetin bolamyz», - dedi Jaqyp Asanov.

Eske sala ketsek, Joǵarǵy Sottyń búgingi otyrysynda sot sheshimin qurastyrý ádisi boıynsha normatıvtik qaýlynyń jobasy tanystyryldy.

«Búgin óte ózekti máseleni qaraımyz. Ol sottardyń, sýdıalardyń sheshimi qandaı bolýy kerek degen másele. Jalpy, sot qyzmetiniń túpki nátıjesi, túpki ónimi dep aıtýǵa bolady - ol sot sheshimi. Sot sheshimi qandaı bolýy kerek. Onyń mazmuny, onyń stılıstıkasy, qurylymy, tili qandaı bolýy tıis? Kóp jaǵdaıda sot sheshimin azamattar túsinbeıdi. Nege túsinbeıdi? Óıtkeni, olar óte qıyn, óte kúrdeli tilmen jazylǵan. Sodan keıin kóp jaǵdaıda qaralyp jatqan máselelerge qatysy joq artyq aqparattarmen sheshimderimizdi toltyryp tastaımyz. Sodan keıin ony qoldan kólemin ulǵaıtamyz. Árıne, qarapaıym adam ondaı kásibı tilmen jazǵan sózderdi túsine bermeıdi», - dep másele kóterdi Jaqyp Asanov QR Joǵarǵy sotynyń búgingi jalpy otyrysynda.