Joǵarǵy Sottyń Internet-resýrsy «Qazkontent» AQ-nyń 2014 jylǵy reıtıngi qorytyndysy boıynsha birinshi oryn aldy

ASTANA. QazAqparat - Búgin jalpy otyrys sheńberinde Qazaqstan Respýblıkasy Joǵarǵy Sotynyń Tóraǵasy Qaırat Mámı QR Joǵarǵy Sotynyń janyndaǵy Sottardyń qyzmetin qamtamasyz etý departamentiniń basshylyǵyn «Qazkontent» AQ quratyn reıtıngke sáıkes 2014 jyldyń qorytyndysy boıynsha Joǵarǵy Sottyń birinshi oryn alýymen quttyqtady.

Óz sózinde Qaırat Mámı: «Bul marapat - sottar qyzmetiniń ashyqtyǵy men aıqyndylyǵynyń kepili. Aldaǵy ýaqytta da bul jumysqa zor mán berip, ony únemi jetildirip otyrý kerek. Sýdıalar aqparattyq-ımıdjdik is-sharalarǵa belsendi túrde qatysyp, sot júıesiniń transparenttigin nyǵaıtýǵa atsalysýy tıis», - dep atap ótti.

«Qazkontent» AQ Qazaqstan Respýblıkasy Investıtsııalar jáne damý mınıstrligi Baılanys, aqparattandyrý jáne aqparat komıtetine qarasty vedomstvolyq qurylym bolyp tabylady. Atalǵan uıym Internettiń ulttyq segmentin jáne memlekettik organdardyń veb-saıtyn damytý jónindegi memlekettik saıasatty iske asyrýmen aınalysady.

Joǵarǵy Sottyń saıty Internet-resýrstardy kontenttik súıemeldeý jáne jetildirýge júrgizilgen taldaý qorytyndysy boıynsha birinshi oryndy ıelendi. Іrikteý respýblıkadaǵy 30 memlekettik organ saıttarynyń arasynda júrgizildi. Jeńimpazdy anyqtaý krıterıılerine mynadaı ındıkatorlar qoldanyldy: aqparattyń ózektiligi, ony jarııalaýdyń jyldamdyǵy, saıttyń oqylýy, ınteraktıvtiligi men mýltımedııalylyǵy. Buǵan qosa, memlekettik organnyń birinshi basshysynyń jeke blogynyń jumys isteýi jáne Internet-resýrsty áleýmettik jelilerde jetildirý jumystaryna da mán beriledi.

Memlekettik organdar veb-saıttarynyń reıtıngisi jyl boıyna aı saıyn shyǵarylyp keldi. Joǵarǵy Sottyń Internet-resýrsy 2014 jyldyń shilde-qazan aılary aralyǵynda turaqty túrde birinshi oryndy ıelenip keldi.

Bıyl Internet-resýrstyń tutynýshylar sanyn arttyrý maqsatynda onyń jumysy men dızaıny jańartyldy. Atap aıtqanda, sot júıesiniń respýblıkalyq resýrsy men óńirlik saıttar úshin birtutas tuǵyrnama ázirlendi, adaptıvti betteý tehnologııasy engizildi, ınterfeıstiń sapasy jaqsartyldy. Saıttyń yńǵaıly oqýǵa arnalǵan (kózi nashar kóretinder úshin) nusqasy iske qosyldy. Saıtta sot júıesiniń «Sot kabıneti», «Sot qujattarymen tanysý», «Tyńdalatyn ister tizimi» jáne t.b. birqatar praktıkalyq servısteri ornalastyrylǵan.

Internet-resýrstyń jańalyqtar bólimi kún saıyn 3 tilde jańartylyp otyrady, foto jáne beınematerıaldar da turaqty túrde salynady. Tutynýshylar úshin saıttyń mobıldik nusqasy jumys isteıdi, saıtty qoldanýshylarmen tyǵyz baılanys ornatylǵan.