Joǵarǵy Sottyń aralasýymen myrysh shyǵaratyn iri kásiporynnyń 28 qyzmetkeri 19 mln. teńge ótemaqy aldy

ASTANA.  2 tamyz. QazAqparat - QR Joǵarǵy Sotynyń azamattyq jáne ákimshilik ister jónindegi qadaǵalaýshy sot alqasy Shyǵys Qazaqstan oblysyndaǵy myrysh shyǵaratyn iri kásipornynyń 28 qyzmetkeriniń buzylǵan quqyqtaryn qalpyna keltirip, saqtandyrý kompanııasyna belgilengen ótemaqyny tóleýge mindettedi.

Bul týraly búgin QR Joǵarǵy Sotynyń  aǵymdaǵy jyldyń 6 aıyn qorytyndylaýǵa arnalǵan brıfıng barysynda resmı ókil Oksana Peters málim etti.

 «Kásiporyn jumysshylary óz densaýlyqtaryna zııan keltiretin ortada jumys isteıtindikten ártúrli kásibı aýrýlarǵa shaldyqqan. Medıtsınalyq jáne sanıtarlyq saraptamanyń qorytyndysy boıynsha ár qyzmetkerdiń jumys isteý qabiletiniń tómendegeni rastalyp, jumys berýshiniń kinási dáleldengen», - deıdi O. Peters.

Onyń aıtýynsha, kásiporyn qyzmetkerleri densaýlyǵynyń zaqymdanýynan týyndaǵan shyǵyndy óteý týraly saqtandyrý kompanııasyna barǵan. Alaıda, saqtandyrý kompanııasy tólemnen bas tartqan.

Osyǵan baılanysty sotqa júgingen jumysshylardyń talabyna arnaıy aktiler shyǵarylǵanymen, keıinnen bular apellıatsııalyq satyda qanaǵattandyrylmaǵan bolatyn. «28 qyzmetker óz quqyqtaryn qorǵaý maqsatynda Joǵarǵy Sotqa júgindi. Qadaǵalaýshy sot alqasy shyǵarylǵan sot aktilerin ózgertip, jumysshylardyń talabyn qanaǵattandyrý týraly sheshim qabyldady. Saqtandyrý kompanııasynan kásiporyn qyzmetkerleriniń paıdasyna 19 mln. teńge óndirildi», - deıdi O. Peters.