Joǵarǵy sotta aktsıonerlik qoǵamdar týraly zańnamany qoldaný talqylanady
11:53, 28 Maýsym 2018
ASTANA. QazAqparat - 29 maýsym kúni 15:00-de Joǵarǵy sottyń kezekti jalpy otyrysy bolady, dep habarlaıdy QazAqparat vedomstvonyń baspasóz qyzmetine silteme jasap.
Kún tártibine Joǵarǵy sottyń tórt normatıvtik qaýly jobasy qoıylǵan. Olar: jańadan ashylǵan derekter boıynsha sot aktilerin qaıta qaraý týraly; qylmystyq ister boıynsha protsestik shyǵyndardyń óndirilýi; korporatıvtik daýlar boıynsha zańdardyń qoldanylýy; aktsıonerlik qoǵamdar týraly zańnamany qoldaný.
Erteńgi otyrysta, budan bólek, birqatar normatıvtik qaýlylardyń kúshin joıý máselesi de qaralady.
Otyrystyń tikeleı translıatsııasyn Joǵarǵy sottyń Facebook paraqshasynan jáne YouTube-arnasynan, sondaı-aq joǵarǵy sot organynyń saıty men «Zakon.kz» portalynan kórýge bolady.