Joǵarǵy Sot janynan mamandandyrylǵan alqa qurý ınvestıtsııalyq daýlardy sheshýdi jedeldetedi - Q. Mámı

ASTANA. QazAqparat - QR Joǵarǵy Sotynyń janynan arnaıy mamandandyrylǵan alqa qurý ınvestıtsııalyq daýlardy sheshýdi jedeldetedi. Búgin Astanada «Ádiletti sot júıesi jáne turaqty zańnama - tartymdy ınvestıtsııalyq klımattyń negizi» atty taqyryppen ótip jatqan «dóńgelek ústel» barysynda QR Joǵarǵy Sotynyń Tóraǵasy Qaırat Mámı osylaı málim etti.

«Tájirıbe júzinde barlyq isterdiń qaralý barysynda memlekettik organdar da, bıznes sýbektileri de ony Joǵarǵy sotqa deıin barǵyzýǵa umtylady. Buǵan quqyq normalaryn qoldaný barysynda qatelikter jeberetin, tipti keı jaǵdaıda memleket múddesin teris túsingen jergilikti sottar da jol berip jatyr. Ekinshi jaǵynan, sot sheshimderi bir ǵana maqsat úshin - tek joǵary sot ınstantsııalarynyń qaýlysyn ıelenýi úshin talasqa túsetin jaǵdaılar da jıi kezdesedi. Sonyń saldarynan buǵan ýaqyt ta ketedi, ınvestıtsııanyń ekonomıkalyq tıimdiligi de joǵalady. Osyǵan oraı, biz Joǵarǵy sot janynan mamandandyrylǵan sot jáne alqa qurý sot aktilerin qaraý tártibin meılinshe qysqartady, ınvestıtsııalyq daýlardyń túpkilikti sheshimin jedeldetedi dep oılaımyz», - dedi Q. Mámı.

Onyń sózine qaraǵanda, arnaıy mamandandyrylǵan sot qurý sot sýdıalarynyń meılinshe naqty bir baǵytqa mamandanýyn qamtamasyz etedi, al bul óz kezeginde joǵary kásibı bilikti qadamǵa jol ashady.

Eske sala keteıik, qazirgi tańda QR Joǵarǵy soty janynan sheteldik ınvestorlardyń qatysýymen daýlardy qaraıtyn derbes sot qurý máselesi qarastyrylýda. Bul daýlardy neǵurlym joǵary deńgeıde sheshýge jáne jergilikti bılik organdarynyń sotqa yqpal etýiniń yqtımal múmkindigin boldyrmaýǵa múmkindik beredi.