Joǵarǵy Sot Jańaózen munaıshylarynyń isin qaıta qaraıtyn boldy

ASTANA. 14 mamyr. QazAqparat - Búgin QR Joǵarǵy Sotynda 2011 jylǵy 16-17 jeltoqsanda Jańaózen qalasynda jappaı tártipsizdik jasaǵan 14 sottalýshynyń múddelerin qorǵaýshy advokattardyń ótinishine baılanysty, qylmystyq isti aldyrtý arqyly aldyn ala sot otyrysy ótkizildi. Bul týraly QR Joǵarǵy Sotynyń baspasóz qyzmetinen habarlandy.

Toqtala ketetin jaıt, sottalǵan T. Qalıevtiń, N. Asqarulynyń, B. Nepestiń, Sh. Ýtkılovtyń, J. Besmaǵambetovtiń, T. Saqtaǵanovtyń, M. Ámınovtiń, M. Qosbarmaqovtyń, N. Jarylqasynovtyń, Q. Júsipbaevtyń, M. Dosmaǵambetovtiń, Q. Ádilovtyń, S. Aspentaevtyń, R.Tóletaevanyń qorǵaýshylary zańdy kúshine engen sot aktilerin qadaǵalaý tártibinde qaıta qaraýdy surap otyr. «Osyǵan oraı, Joǵarǵy Sottyń qylmystyq ister jónindegi sot alqasy isti aldyn ala qarap, onyń nátıjesi boıynsha shaǵymdalǵan sot aktilerin qaıta qaraý úshin qadaǵalaý óndirisin qozǵaý týraly jáne qadaǵalaý satysynda qorǵaýshylardyń talaptaryn qaraý jóninde sheshim qabyldady», - delingen Qazaqstan Respýblıkasy Joǵarǵy Sotynyń baspasóz qyzmeti taratqan aqparatta.

Eske salsaq, 2012 jylǵy 4 maýsymda Jańaózendegi tártipsizdikterge qatysty is boıynsha 16 aıyptalýshy 3 jylǵa shartty túrde bas bostandyqtarynan aıyryldy, 5 adam raqymshylyqqa ilikti, 3 adam aqtalyp shyqty. Budan basqa, Roza Tóletaeva 7 jylǵa bas bostandyǵynan aıyrylsa, Maqsat Dosmaǵambetov, Naryn Jarylǵasynov, Qanat Júsipbaev - 6 jylǵa, Shabdal Ótkelov - 5 jylǵa, Tańatar Qalıev pen Talǵat Saqtaǵanov - 4 jylǵa, Nurlan Asqaruly, Qaırat Edilov, Marat Ámınov, Baýyrjan Nepes, Jaras Besmaǵambetov, Murat Qosbarmaqov 3 jylǵa bas bostandyqtarynan aıyryldy.