Joǵarǵy Sot tóraǵasy sýdıalar men departament qyzmetkerlerin Naýryz meıramymen quttyqtady
«Ejelden kele jatqan bul mereke bes myń jyldan beri merekelenedi, birlik, toleranttylyq pen turaqtylyq sııaqty basty qundylyqtardy beıneleıdi. Memleket basshysy bul meıramnyń jańarǵan Qazaqstannyń basty qoǵamdyq jáne saıası qundylyqtary, onyń tabysty damýynyń negizgi kepili sanalatynyn árdaıym aıtyp keledi», - dedi Q.Mámı. Ol óz sózinde Naýryz jarastyq pen syılastyqtyń jarqyn kórinisi ekenine, elimizde tatý-tátti ómir súrip kele jatqan barlyq etnos ókilderi bul meıramdy jyl saıyn atap ótetinine toqtaldy. Sondaı-aq, respýblıkada turatyn túrli ult ókilderiniń júzden astam tilinde aıtylǵan merekelik quttyqtaýlar adam janyn erekshe kóńil-kúıge bóleıtinin aıtty.
Joǵarǵy Sot tóraǵasy saltanatty jıynda bıylǵy Naýryz meıramy respýblıkamyzdaǵy asa mańyzdy saıası oqıǵaǵa - Parlament Májilisi men maslıhattar saılaýyna oraılas kelip otyrǵandyǵyn eske salyp ótti.
«Sot korpýsy jáne sot júıesiniń qyzmetkerleri saılaýdyń mańyzdylyǵyn tereń túsinedi. Bul - qazirgi tańdaǵy eń mańyzdy saıası máseleler boıynsha sheshim qabyldaýdaǵy basty ınstıtýt. Halqymyz saılaý quqyǵy arqyly eldiń odan ári damýynyń bolashaq vektoryn anyqtaıdy. Elimizdiń azamattary úshin - bul aıtýly mereke. Olar saılaý ýchaskelerine otbasylarymen kelip, daýys berý úshin kezekte de turýǵa da daıyn» deı kele Q. Mámı jıynǵa qatysýshylardy qalyptastyrǵan dástúrdi buzbastan, tipti balalarymen birge saılaý ýchaskelerine alǵashqylardyń qatarynda kelip, daýys berip, azamattyq paryzdaryn oryndaýǵa shaqyrdy.