«Joǵarǵy Sot Tóraǵasy Qazaqstan halqynan keshirim suraıdy» - respýblıkalyq basylymdarǵa sholý
***
«Egemen Qazaqstan» gazetiniń jazýynsha, keshe «Nur Otan» HDP-nyń Ortalyq apparatynda Elbasy, partııa Tóraǵasy Nursultan Nazarbaevtyń tóraǵalyq etýimen partııanyń Saıası keńesi bıýrosynyń májilisi ótti. Onyń saılaýdan keıingi alǵashqy otyrysynda Parlament Májilisiniń 5-shi shaqyrylymyna «Nur Otan» partııasy atynan baratyn depýtattardyń esimderi málim boldy. Otyrysty ashyp, ótken saılaý Qazaqstannyń demokratııalyq damýyndaǵy mańyzdy qadamǵa aınalǵanyn atap ótken Elbasy Nursultan Nazarbaev: «Halyqaralyq uıymdardyń, basqa da sarapshylardyń ashyq ári ádil saılaý ótti degenin bilesizder. Saılaýshylardyń erkin tańdaý jasaýyna barlyq jaǵdaı jasalǵanyn jurtshylyq ta, sarapshylar da, baıqaýshylar da kórdi. Osylaısha biz demokratııalyq qundylyqtardy qanshalyqty qadirleıtinimizdi búkil dúnıege kórsettik», - dedi. Maqalany tolyǵymen «Májiliske - mandattar» degen taqyryptap oqı alasyzdar.
Táýelsizdiktiń halqymyz úshin qasıetti sezim ekenin ýaqyt dáleldep keledi. Osydan 20 jyl buryn teatr óneriniń irgetasyn qalaǵan, ónerdiń úsh báıteregi Serke Qojamqulov, Qapan Badyrov, Elýbaı Ómirzaqovtyń týǵan jeri Qostanaı óńirinde óz teatry bolady degenge eshkim senbes edi. 2000 jyly oblystyń burynǵy ákimi Ómirzaq Shókeevtiń basshylyǵymen tuńǵysh ret qazaq drama teatry ashylyp, onyń lentasyn Prezıdent Nursultan Nazarbaevtyń ózi qıyp, qostanaılyqtarǵa qutty bolsyn aıtqan bolatyn. Endi, mine, buryn eski mádenıet saraıynda turyp kelgen teatrǵa jańa ǵımarat salyndy. Bul tek qostanaılyqtardyń ǵana emes, bar qazaqtyń mereıin asyratyn qýanysh boldy. Bul jaıynda «Egemen Qazaqstan» gazetiniń búgingi sanyndaǵy «Bar qazaqtyń mereıin asyratyn qýanysh» degen taqyryptan egjeı-tegjeıli bile alasyzdar.
***
«Alash aınasy» gazetiniń turaqty «Dat!» aıdarynda tarıh ǵylymynyń kandıdaty, dotsent Ermek Chýkýbaevpen aradaǵy suhbat «Jastarymyz japa-tarmaǵaı joǵary oqý ornynyń dıplomyn alýǵa umtylmaı, mamandyq alýǵa bet bursa eken deımin» degen taqyryppen berilgen. Basylym tilshisiniń barlyq saýaldaryna tuşymdy jaýap bergen ol: «Dıplomdy sandyqqa salyp tastap, jumys tappaı júrgender jeterlik. Al óndiristiń kóp salasynda maman tapshy. Sondyqtan kásiptik lıtseılerdiń jumysyn durys jolǵa qoıý kerek. Eger jastarymyz naryqtaǵy suranysqa ıe mamandyqtardy tańdap, sol salanyń bilikti mamany bolyp jatsa, onda onyń ózine de, otbasyna da, elge de paıda kóp bolar edi», - deıdi.
Keshe Parlament Senatynyń jalpy otyrysynda sot júıesin jańǵyrtýǵa baǵyttalǵan zań jobalary talqylanyp qabyldandy. Osyǵan oraı «Alash aınasy» gazetiniń beısenbilik sanynda jaryq kórgen «Joǵarǵy Sot Tóraǵasy Qazaqstan halqynan keshirim suraıdy» degen taqyryppen basylǵan maqalada Senat depýtattary bul zań jobalaryna qyraǵylyq tanytqandyǵy jaıynda jazylǵan. Basylymnyń atap ótýinshe, halyq qalaýlysy Svetlana Jalmaǵambetova Jákishevtiń jemqorlyqqa qatysy bolýy saldarynan 6 sýdıanyń jumystan bosaǵandyǵyn, bul rette Joǵarǵy sot tóraǵasyn jemqordy aqtaǵandyǵy úshin kinálaǵan. «Árıne, Qazaqstannyń sot júıesindegi barlyq kemshilikterge Joǵarǵy sottyń tóraǵasy retinde men jaýaptymyn. Men Qazaqstan halqynyń aldynda sot júıesinde oryn alyp kele jatqan kemshilikter úshin keshirim suraımyn», - depti Bektas Beknazarov.
***
«Memleket basshysynyń atyna Ońtústik Qazaqstan oblysy, Saryaǵash aýdany, Eńkes aýylynyń turǵyny Zámzágúl Álimbekovadan hat keldi», - dep jazady «Kazahstanskaıa pravda» gazeti. Kóp balaly ana óz hatynda táýelsiz elimizdi kúlli álemniń moıyndaýy, elimizde san ult ókilderiniń beıbitshilik pen kelisimde ómir súrýi Elbasy júrgizip otyrǵan syndarly saıasattyń jemisi ekenin atap ótedi. Hat avtory :«Bizge aırandaı uıyǵan eldiń myzǵymas birligi, halqymyzdyń tatý tirligi qajet. Aq jaýlyqty analar árqashan Sizben birge! Sizdi qoldap, qýattaımyz» dep izgi nıetin bildirip, óz oıyn jyr joldarymen túıindeıdi.