Joǵarǵy sot sýdıalardyń jumysyn qalaı baqylaıdy

ASTANA. QazAqparat - Búginde respýblıka boıynsha ornalasqan barlyq sot zaldarynda aýdıo men beınebaqylaý júıesi ornatylǵan. QR Joǵarǵy soty atalǵan qurylǵylar arqyly árbir otyrysty baqylap otyrady. Budan bólek, arnaıy axýaldyq ortalyqta bir kúnde túsken aryz-shaǵymdardyń sany, qaralǵan isterdiń kólemi jáne taǵy basqa 700-den astam kórsetkish boıynsha árbir sottyń jumysy baǵalanady. QazAqparat tilshisi atalǵan júıeni tanystyrýǵa arnalǵan press-týrǵa qatysyp qaıtty.

Axýaldyq ortalyqta birneshe adam otyrady. Olar elimizdegi sottardyń jumysyna qatysty kez kelgen statıstıkany kóre alady. Tipti, árbir sot zalyndaǵy otyrysty beınebaqylaý júıesi arqyly úlken ekranǵa shyǵaryp, otyrystyń qanshalyqty ádil ótip jatqanyn tyńdaı alady.

Jýrnalıster ortalyqqa saǵat 11.00-den asqanda kirdi. «Tórelik» aqparattyq júıesi dál sol ýaqytqa deıin respýblıka boıynsha sottarǵa túsken aryz-shaǵymdardyń statıstıkasyn shyǵaryp berdi. Máselen, 11.20-ǵa deıin azamattyq daý-damaılarǵa qatysty 312 shaǵym tústi. Budan bólek, osy sanattaǵy qaralǵan isterdiń esebi shyqty. Onyń sany 583-ti qurady. Sol sııaqty qylmystyq jáne ákimshilik quqyq buzýshylyq isteri de tirkelip otyrady.

«Jalpy, barlyq sottarǵa bir kúnniń ishinde shamamen 20 myń xat-xabarlar túsedi. «Tórelik» júıesi arqyly biz naqty istiń qaı oblysta, naqty qaı sotqa túskenin de kóre alamyz. Búginde sottarǵa joldanatyn qujattardyń basym bóligi - 79 paıyzy elektrondyq úlgide túsedi. Sonyń arqasynda sot materıaldaryn onlaın rejımde baqylaýǵa múmkindik bar», - deıdi QR Joǵarǵy soty janyndaǵy Axýaldyq ortalyqtyń jetekshisi Saltanat Smaǵulova.

Aıta ketken jón, «Tórelik» júıesinde sottarǵa túsken materıaldardyń esebinen bólek memlekettik baj salyǵynyń tólengeni, tipti aqshanyń qaı bank arqyly ótkeni, aıyppuldardy óndirý deńgeıi, sot otyrystarynyń statıstıkasy, árbir protsestiń bastalatyn ýaqyty, otyrystyń keshigip bastalýy, qylmystyq jáne azamattyq ister qaı oblysta jıi qaralady, qylmystardyń naqty sanaty, sýdıalardyń sheshimderi, qylmystardyń qaıtalanýy jáne taǵy basqa júzdegen kórsetkishter tirkeledi.

«Osylaısha, biz barlyq sot otyrystaryn baqylaımyz. Máselen, bir jerde otyrys ýaqytynda bastalmasa, biz ony eshbir aryz-shaǵymsyz bilip otyramyz da, tekserý amaldaryn bastaımyz. Sosyn xalyq tarapynan qujattardy tirkeýge qatysty aryzdar jıi túsedi. Biz ony da osy jerdegi dıagrammalar arqyly árbir qujatty tirkeý jumysyn qadaǵalaımyz. Sol sııaqty sot otyrystaryna qatysty shaǵym túsken jaǵdaıda biz ortalyqtyń beınebaqylaý júıesi arqyly bárin óz kózimizben kórip, sýdıalardyń jumysyna baǵa bere alamyz», - deıdi QR Joǵarǵy sotynyń buqaralyq aqparat quraldarymen jumys jónindegi úılestirýshi sýdıasy Elena Maksıýta.