Joǵarǵy Sot Prezıdentke saıası reformaǵa qatysty usynystaryn berdi
«Aldaǵy ýaqytta bılik tarmaqtarynyń quzyryn qaıta qaraý boıynsha jumystar bastalady, sonyń ishinde quqyqtyq keńistikte edáýir ózgerister oryn alady, bul iste sot júıesi de tys qalmaıdy. Ózderińiz bilesizder, Prezıdent tapsyrmasymen Úkimette arnaıy komıssııa quryldy. Joǵarǵy Sot aldaǵy reformalarǵa qatysty óziniń usynystaryn engizdi», - dedi Joǵarǵy Sot tóraǵasy Qaırat Mámı.
Onyń sózinshe, usynystar negizinen sot júıesin, sot óndirisi men sot tóreligin júrgizý salasy boıynsha Úkimetpen, Parlamentpen jáne ózge de memlekettik organdarmen baılanysyn qamtyp otyr.
«24 qańtarda jumys tobynyń otyrysyna Memleket basshysy qatysty jáne Elbasyna osy saýaldar boıynsha bastapqy usynystar baıandaldy. Bizdiń salaǵa keletin bolsaq, eń birinshiden, memleket Konstıtýtsııasynyń keıbir normalaryna engiziletin ózgerister týrasyndaǵy usynystar aıtyldy», - dedi tóraǵa sýdıalardyń keńeıtilgen otyrysynda.
Aıta keteıik, keshe QR Prezıdenti Nursultan Nazarbaev otandyq telearnalar arqyly bılik tarmaqtary arasynda ókilettikterdi bólý máseleleri jónindegi úndeýin jarııa etti. Onda Prezıdenttiń áleýmettik-ekonomıkalyq protsesterdi retteýdegi birshama ókiletterin Úkimetke jáne basqa da atqarýshy organdarǵa berý, Úkimetti jasaqtaýda Parlamenttiń rólin kúsheıtý qarastyrylǵan.
Eske sala ketsek, QR Prezıdenti búkilhalyqtyq talqylaýǵa shyǵarǵan Qazaqstan Respýblıkasynyń Konstıtýtsııasyna ózgeris engizýge qatysty usynystar 26 aqpanǵa deıin myna mekenjaı boıynsha qabyldanady: 010000, Astana qalasy, Esil aýdany, Úkimet úıi, Qazaqstan Respýblıkasy Prezıdenti Ákimshiliginiń Memlekettik quqyq bólimi, elektrondyq poshta - ap2017@akorda.kz.