Joǵarǵy sot qazaqstandyq qylmyskerlerdi sýrettep berdi

ASTANA. QazAqparat - Búginde QR Joǵarǵy sotynyń arnaıy ortalyǵy beınebaqylaý júıesi arqyly barlyq sot otyrystary baqylap otyrady. Al «Tórelik» aqparattyq júıesinde qylmystyq isterdiń sany, quqyq buzýshylyqtardyń sanaty, sottalǵandardyń jas mólsheri sııaqty júzdegen kórsetkishter tirkeledi. Sonyń negizinde mamandar Qazaqstandaǵy qylmyskerdiń ortasha portretin eseptep shyǵardy, dep xabarlaıdy QazAqparat tilshisi.

«Bizde qylmystardyń 86 paıyzyn erkekter jasaıdy. Olardyń ortasha jasy 21-29 jasta, sondaı-aq 30-39 jastaǵy azamattar qylmysqa jıi barady. Ondaı adamdardyń bilimi - orta, ózderi boıdaq bolyp keledi. Sonda Qazaqstandaǵy qylmyskerdiń ortasha portreti bylaı: jasy 21-29-da, orta bilimi bar, úılenbegen. Al áıelderge keler bolsaq, olardyń kóbisi 30-39 jasta, bilimi de orta jáne turmys qurmaǵan. Búginde qylmystardyń 14 paıyzy áıelderdiń úlesinde», - deıdi ortalyq jetekshisi Saltanat Smaǵulova.

Onyń aıtýynsha, «Tórelik» júıesinde tirkelgen málimetter boıynsha, jyl basynan beri qylmystardyń basym bóligi Shyǵys Qazaqstan oblysynda bolǵan. Ol jerde 4 756 is qaraldy. Odan keıin Almaty qalasy  (4 332 is) men Ońtústik Qazaqstan oblysy (4 246 is) keledi. Jalpy, qylmystardyń deni - urlyq, adamdy tonaý men soqqyǵa jyǵý.

Aıta keteıik, búgin QR Joǵarǵy soty buqaralyq aqparat quraldary úshin press-týr uıymdastyryp, sot otyrystaryn qalaı baqylaıtynyn kórsett i.