Joǵarǵy Sot qazaqstandyq kompanııanyń «Shivas Regal» taýarlyq belgisin ruqsatsyz qoldanýyn zańsyz dep tapty

ASTANA. QazAqparat - Joǵarǵy Sottyń atyna QR Syrtqy ister mınıstrliginen hat kelip tústi. Hatta ol Syrtqy ister mınıstrligine kelip túsken Frantsııanyń Qazaqstandaǵy Elshiliginiń alǵys hat notasynyń mazmunyn habarlaǵan. Elshilik Qazaqstannyń joǵary sot organynyń «Chivas Holdings (IP) Limited» kompanııasynyń talap aryzyn qanaǵattandyrý jónindegi qaýlysyna qatysty óz alǵystaryn bildirgen.

QR Joǵarǵy Sotynyń baspasóz qyzmetiniń habarlaýynsha, notada: «Joǵarǵy Sottyń qaýlysy sheteldik ınvestorlar úshin zııatkerlik menshik quqyqtaryn qorǵaý salasyndaǵy yntalandyrýshy kórsetkish bolyp tabylady jáne Qazaqstandaǵy ınvestıtsııalyq ahýalǵa oń áserin tıgizedi. Bul sheshim Qazaqstan men Eýropalyq Odaq arasynda qol qoıylǵan keńeıtilgen áriptestik pen yntymaqtastyq týraly kelisimge engizilgen saýda belgileri úshin aımaqtyq / ulttyq túpkilikti qaǵıdattarǵa tolyǵymen sáıkes keledi»,- delingen.

Azamattyq daýdyń máni mynada.

Qazaqstannyń Ádilet mınıstrliginiń Zııatkerlik menshik quqyǵy komıteti «Chivas Holding (IP) Limited» kompanııasyna aıryqsha quqyq beretin «Chivas Regal» elementin taýar belgisi retinde tirkegen. Alaıda, óndirýshi «Shivas Regal» taýarlyq belgisi tańbalanǵan 14 myńnan astam bótelke shotland vıskıin «Brıg» JShS-y Qazaqstan aýmaǵyna tasymaldaǵan.

«Chivas Holding (IP) Limited» kompanııasy «Brıg» JShS tasymaldaǵan taýar olarǵa tıesili «Shivas Regal» taýarlyq belgisimen tańbalanǵandyǵyna silteme jasaı otyryp, zııatkerlik menshikti ruqsatsyz jáne kelisimsiz qoldanǵanyn negizge ala otyryp sotqa shaǵymdanǵan. Talap aryzda «Brıg» JShS-ynyń «Shivas Regal» taýarlyq belgisin qoldanýǵa baǵyttalǵan áreketterge tyıym salý kórsetilgen.

Aqtóbe oblysynyń mamandandyrylǵan aýdanaralyq ekonomıkalyq soty, sondaı-aq apellıatsııalyq jáne kassatsııalyq satylar bul talap-aryzdy qanaǵattandyrmaǵan. Sot aktisimen kelispegen kompanııa Joǵarǵy Sotqa júgingen. Ótinishhatta talapker 2012 jyly Qazaqstan Keden odaǵyna kirgenin, soǵan oraı qabattas ımportqa tyıym salatyn arnaıy normalardyń kúshine engendigin sottardyń eskermegendigin atap kórsetken.

Joǵarǵy Sot osy azamattyq isti qarastyra kele, is boıynsha shyǵarylǵan sot aktileriniń kúshin joıyp, «Chivas Holding (IP) Limited» kompanııasynyń talabyn qanaǵattandyrý týraly jańa sheshim shyǵardy: «Brıg» JShS-nyń «Shivas Regal» taýarlyq belgisin qoldaný áreketi osy taýarlyq belginiń quqyq ıelenýshisiniń quqyqtaryn buzýyna baılanysty zańsyz dep tanyldy, sáıkesinshe atalǵan taýarlyq belgini «Brıg» JShS-nyń budan ári quqyq ıelenýshiniń kelisiminsiz qoldanýyna tyıym saldy.

Joǵarǵy Sot óziniń qaýlysynda birinshi, apellıatsııalyq jáne kassatsııalyq satydaǵy sottardyń materıaldyq quqyq normalaryn durys túsinbegendigin jáne qoldanbaǵandyǵyn kórsetti.

«Brıg» JShS atalǵan taýarlyq belgini qoldanýǵa jáne ony respýblıka aýmaǵyna engizýge quqyly ekendigin rastaıtyn dáleldemelerdi sotqa usyna almady.