Joǵarǵy sot bıznestiń múddesin qorǵaýǵa múddeli

ASTANA. QazAqparat - QR Joǵarǵy soty men "Atameken" UKP otandyq bıznesti birlesip qorǵaýǵa ýaǵdalasty. Osyǵan oraı, arnaıy is-sharalar jospary daıarlandy, dep xabarlaıdy QazAqparat tilshisi.

"Biz barlyq kásipkerlerdiń quqyqtaryn sotta barynsha qorǵaýdy kózdeımiz. Búginde ınternet pen áleýmettik jelilerdiń keńinen taralýymen biz xalyqpen tikeleı dıalog jasaýǵa múmkindik aldyq. Sot sheshimimen kelispeıtin adamdar vırtýaldy keńistikke óz aryz-shaǵymdaryn jıi salyp otyrady. Atalǵan áreketter de naqty is-qımylǵa sebep bolyp jatady. Biz osy ashyqtyq qaǵıdatyn jalǵastyrýǵa daıynbyz. Kásipkerlerdiń quqyqtaryn qorǵaıtyn "Atameken" ulttyq kásipkerler palatasymen birlesip jumys isteıtin bolamyz", - dedi QR Joǵarǵy sotynyń tóraǵasy Qaırat Mámı bıznestiń quqyqtary men zańdy múddelerin sotta qorǵaýǵa arnalǵan forýmda.

Tóraǵa memleket pen bıznes arasyndaǵy daý-damaılarǵa qatysty kózqarasty da jaqsy biletinin jetkizdi. "Shyny kerek, kásipkerler memleketpen sottasqanda sýdıalardyń búıregi memleketke buryp turady dep oılaıdy. Al memlekettik organdar bıznesti tártip buzady dep baıbalam salady. Odan xalyqqa keletin qaýip-qaterler de joq emes. Sondyqtan sottar ondaı daýlardy jan-jaqty qarap, ádil sheshim shyǵarýy tıis", - dep atap kórsetti Mámı.

Aıta ketken jón, QR Joǵarǵy soty men "Atameken" palatasy bıznesti sotta qorǵaýǵa qatysty negizgi máselelerdi zerdelep shyqpaqshy. Budan bólek, bıznestiń quqyqtyq mádenıetin kóterý, daý-damaılardy sotqa deıin sheshý jáne taǵy basqa sharalar josparlanǵan.