Joǵarǵy sot: mektepterde oramal taǵýǵa salynǵan tyıym joıylǵan joq

<p>ASTANA. KAZINFORM - QR Joǵarǵy soty mektepte qyz balalarǵa oramal taǵýǵa salynǵan tyıym alynbaǵanyn málimdedi.&nbsp;</p>

"Buqaralyq aqparat quraldarynda jáne áleýmettik jelilerde Joǵarǵy sot mektepterde oramal taǵýdy zańdy dep tapty degen jalǵan aqparat taralýda.

Іsti qaraý aıasynda Joǵarǵy Sottyń ákimshilik ister jónindegi sot alqasy bilim berý mekemesinde oramal taǵýdyń zańdylyǵy jónindegi máseleni talqylaýǵa aralaspaǵan.

Kassatsııalyq saty mekteptiń oqýshyny sabaqqa jibermeýin zańsyz dep tanydy, óıtkeni bilim alý quqyǵy Qazaqstan Respýblıkasy azamattarynyń negizgi konstıtýtsııalyq quqyqtarynyń biri bolyp tabylady.

Sonymen qatar, beıindi Mınıstrlikte orta bilim berý uıymdary úshin mindetti mektep formasyna qoıylatyn talaptardy bekitý jónindegi ókilettikter bar. Mınıstrdiń tıisti buıryǵy zańsyz dep tanylmaǵan jáne kúshi joıylmaǵan" delingen habarlamada.

Sondaı-aq, Joǵarǵy sot baspasóz qyzmeti ata-analar mektep jarǵysy men mektep formasyna qoıylatyn talaptardy saqtaýǵa mindetti ekenin atap ótken.

Bul rette elimizdegi eń joǵarǵy sot organy ata-analardyń balalardy tárbıeleý men bilim berý, olardyń quqyqtary men múddelerin qorǵaý jónindegi ózderine alǵan jáne zańda belgilengen, onyń ishinde Ákimshilik quqyq buzýshylyq týraly kodekste kózdelgen mindetterdi oryndamaýy jaýaptylyqqa ákep soǵatynyn eske salady.

Aıta ketsek, Qazaqstandyq zańger Jaslan Aıtmaǵanbetov oqýshy qyzdyń oramal taqqany úshin mektep qabyrǵasynda bilim alýyna shekteý qoıý máselesin kóterip, Joǵarǵy sotqa júgingen. Keshe ol osy is boıynsha sheshim qabyldanǵanyn málimdegen edi. 

Mektepterde hıdjab kııýge ruqsat berý máselesi elimizde birneshe jyldan beri talqylanyp keledi.

Buǵan deıin Oqý-aǵartý mınıstri Ǵanı Beısembaev oqýshylardyń mektepke hıdjabpen kelýine qatysty bylaı degen edi:

«Konstıtýtsııa boıynsha Qazaqstan — zaıyrly memleket. Mektep te zaıyrly bolyp sanalady. 2016 jyly bekitilgen oqýshylardyń mektep formasy men kıimine qatysty buıryq bar. Ol ózgergen joq. Sondyqtan balalar bilim ordasyna mektep formasymen kelýi kerek».

Sondaı-aq, Premer-Mınıstrdiń orynbasary Tamara Dúısenova jumysta hıdjab kııý máselesine pikir bildirdi.