Joǵalyp ketti delingen Erjan Elikov «Bolashaq» stıpendııasynan aıyrylyp qalǵan
M. Alpysbaıdyń sózine qaraǵanda, E. Elikovti stıpendııasynan aıyrý týraly sheshim stýdentti ýnıversıtet oqýdan shyǵarǵannan keıin Respýblıkalyq komıssııa tarapynan qabyldandy. 2011 jyly ortalyq stýdenttiń oqý úlgerimine qatysty monıtorıng júrgizgen.
«Biz onyń alǵan baldaryn kórip turdyq. Birneshe jyl boıy baldary tómen boldy, osy rette ýnıversıtet ol dıplom almaıtyndyǵyn, onyń ornyna stýdent dáristerdi tyńdap shyqty degen sertıfıkat alatyndyǵy týraly sheshim qabyldady. ıAǵnı, ol túpki maqsatqa qol jetkize almady. Onyń akademııalyq dáreje almaıtyny týraly sheshimdi ýnıversıtet qabyldady. Bilim ordasynyń oqýdan shyǵarý tártibine toqtalatyn bolsaq, stýdent ary qaraı da dáristerge qatysa alady, biraq ta oǵan akademııalyq dáreje berilmeıdi. Osydan keıin bizge tıisti málimet berilgennen keıin, ortalyq osy máseleni respýblıkalyq komıssııanyń qaraýyna engizdi. Qoldanystaǵy zańnama aıasynda stıpendıant oqý úlgerimine baılanysty stıpendııadan aıyryldy», - dedi ol «QazAqparat» tilshisine bergen suhbatynda.
Onyń aıtýynsha, 2014 jyly Halyqaralyq baǵdarlamalar ortalyǵynyń talap-aryzy boıynsha sot stıpendıant pen onyń ata-anasy turǵan páterdi tárkiledi. Páter quny tek 4 mln. teńgege jýyq shyǵyndy japty, al onyń oqýyna 24 mln. teńge jumsalǵan bolatyn. 2016 jyly baǵdarlamalar ortalyǵy talap-aryzy boıynsha sot qalǵan somany stıpendıanttyń kepilgeri, ıaǵnı ákesine tóletkizý qaýlysyn shyǵardy.
«Ýnıversıtetten shyǵarý men stıpendııadan aıyrylatyn kezeńde Erjan Elikov bizben jáne ata-anasymen baılanysqa shyǵyp turdy. Ol óz kezeginde eshteńeni de joqqa shyǵarmady, tek bereshek qarjyny qaıtarý joldary týraly suraqtar qoıdy. Osy rette bizde elektrondy poshtada naqty hattar da bar. Biz oǵan eger de qaryzdy jappasa, onda bul mindet kepilgerine júkteletinin túsindirdik. Onyń otbasy da bul qaǵıdany biletin. Bul turǵyda eshkim bilmedi jáne barlyǵy bir sátte boldy dep aıtý qısynsyz»,-dep toqtaldy M. Alpysbaı.
Belgili bolǵandaı, Erjan Elikov bakalavr dárejesin alýǵa oqýǵa túsken jáne onyń vızasy 4-5 jylǵa jaramdy.
Esterińizge sala keteıik, jaqynda buqaralyq aqparat quraldarynda E. Elikov esimdi jigit «Bolashaq» baǵdarlamasy aıasynda Pensılvanııa shtatyna ketkendigin jáne oqýdyń aıaqtalýyna bir aı qalǵanda ata-analarymen baılanysqa shyǵýyn doǵarǵandyǵy habarlanǵan edi.