Joǵalǵan daýys berý quqyǵyn beretin esepten shyǵarý kýálikteri qalpyna keltirilmeıdi - QR OSK
Ol óz sózinde saılaý týraly zańǵa jáne Ortalyq saılaý komıssııasy bekitken daýys berý quqyǵyn beretin esepten shyǵarý kýálikterin berý jáne esepke alý erejelerine sáıkes saılaýshy saılaý kúni óziniń bolý ornyn aýystyrǵan kezde tirkelgen jeri boıynsha ýchaskelik saılaý komıssııasynan daýys berý quqyǵyn beretin esepten shyǵarý kýáligin alýǵa ótinish jasaýǵa quqyly ekendigin atap ótti.
«Esepten shyǵarý kýáligi saılaýshyǵa nemese senimhat boıynsha onyń ókiline 4 naýryzdan bastap, 19 naýryz kúngi saǵat 18:00-ge deıin beriledi. Ýchaskelik saılaý komıssııasynyń tóraǵasy nemese múshesi esepten shyǵarý kýáligin toltyrýdy saılaýshynyń tilegi boıynsha memlekettik nemese orys tilinde júrgizedi. Bul rette esepten shyǵarý kýáligin tabys etken ýchaskelik saılaý komıssııasynyń múshesi saılaýshylar tizimindegi saılaýshy teginiń tusyna, «eskertýler» degen baǵanǵa esepten shyǵarý kýáliginiń tabys etilgeni, onyń bes tańbaly serııalyq nómirin, berilgen kúni týraly jazý engizýi jáne qolyn qoıýy tıis», - dedi M.Sársembaev.
Sonymen qatar, onyń atap ótýinshe, saılaýshynyń esepten shyǵarý kýáligin alýǵa bergen ótinishi saılaýshylar tizimine qosa tirkeledi jáne atalǵan saılaý ýchaskesi boıynsha ony tizimnen alyp tastaý úshin negiz bolyp tabylady. Esepten shyǵarý kýáligi basqa saılaý okrýginde nemese bir eldi mekenniń shegindegi basqa saılaý ýchaskesinde daýys berýge qatysqysy kelgen saılaýshylarǵa berilmeıdi.
«Joǵalǵan daýys berý quqyǵyn beretin esepten shyǵarý kýálikteri qalpyna keltirilmeıdi jáne kóshirme nusqasy berilmeıdi. Daýys berý kúni esepten shyǵarý kýáligin kórsetken kezde saılaýshy kelgen jeri boıynsha tirkeledi. Oblystyq, qalalyq, aýdandyq máslıhattardyń depýtattaryn saılaýda basqa eldi mekendegi, biraq saılaýshy tirkelgen saılaý okrýginiń shegindegi saılaý ýchaskelerinde ǵana daýys berýge bolady. Daýys berý barlyq ýchaskelerde jergilikti ýaqyt boıynsha tańǵy saǵat 07:00-de bastalyp, keshki saǵat 20:00-de aıaqtalady. Eger saılaýshy saılaý kúni densaýlyq, múgedektik jaǵdaıyna, otbasynyń syrqat múshesine kútim jasaý sebebine, sondaı-aq saılaý ýchaskesi qurylmaǵan shalǵaıdaǵy jáne qatynasý qıyn jerde bolýyna baılanysty saılaý ýchaskesine kele almaǵan jaǵdaıda, ol ýchaskelik saılaý komıssııasyna «úıde» daýys berýdi uıymdastyrý týraly ótinishpen júginýge quqyly. Ótinishter aǵymdaǵy jylǵy 20 naýryz kúngi saǵat 12:00-ge deıin qabyldanady», - dedi OSK múshesi.