Joǵalǵan 5 jasar qyz sońǵy ret júgeri alqabynda bolǵan: Hronologııa jasaldy
«Qostanaı oblysynda ondaǵan adam iz-túzsiz ketken qyzdy izdep-tabýǵa qolǵabys etip jatyr. Jergilikti jáne qala turǵyndary polıtsııaǵa júgeri alqabyn súzip shyǵýǵa kómektesýde. 5 jasar qyzdy sońǵy ret dál sol jerde kórgen», - delingen polıtsııa málimetinde.
Usynylǵan vıdeoda júgeri alqabyna kóptegen adam jınalyp jatqanyn kórýge bolady.
Eske salaıyq, Jambyl aýylynda turatyn 5 jasar qyz 7 tamyz kúni tańerteń úıinen shyǵyp ketken. Erekshe belgileri – sóılemeıdi. Úıde 18 jáne 13 jastaǵy ápkeleriniń qaraýynda qalǵan.
Polıtsııa qyzmetkerleri bala joǵalǵan kúnniń hronologııasyn jasady.
Kınologııa qyzmeti ortalyǵynyń qyzmetkeri Qaırat Bısembınniń aıtýynsha, bala úıinen tańerteń 7-ge qaraı shyqqan –ekinshi qabattaǵy asúıdiń terezesinen shyǵyp, gaz qubyry arqyly turǵyn úıdiń kireberis esigindegi kúnqaǵarǵa túsken, keıin kúnqaǵardan aǵashqa órmelegen.
Sol ýaqytta aýladaǵy shýǵa eleńdep, syrtqa shyqqan kórshi er adam balaǵa aǵashtan túsýge kómektesken. Er adam ony páterge alyp barǵan. Esikti qaǵyp turǵan kezde qyz bala kóshege júgirip shyǵyp ketken.
Saǵat 8:04-te bala vıdeobaqylaý kamerasyna túsip qalǵan. Sondaı-aq baldyrǵandy aýyl turǵyny kórgen. Keıin qyz «Qostanaı – Vedenka» trassasy baǵytyna bet alǵan.
Saǵat 8:06-da taǵy bir adam ony Ortalyq kóshede kórgen.
Saǵat 8:24-te balany aýylǵa qaraı kele jatqan traktorshy baıqaǵan.
Saǵat 8:30-da ony sondaı-aq aýylǵa bet alǵan velosıpedshi kórgen.
Іzdestirý jumystary kórshi Altyn dala kentinde de júrgizildi. Bul kent joǵalǵan qyz turatyn aýyldan 9 km jerde ornalasqan.
Qazirgi ýaqytta polıtseılerge bala sońǵy ret júgeri alqabynda bolǵany týraly málimet túsken. Alqapty polıtseıler qorshaýǵa aldy, izdestirý jumysyna dron paıdalanylyp jatyr.
Buǵan deıin Qostanaı oblystyq Polıtsııa departamentiniń bastyǵy Erlan Omarbekov balanyń anasymen birge tikushaqta aınalany sholyp ótken bolatyn.