«JQJK - 2020» baǵdarlamasy aıasynda 17 myńnan astam qazaqstandyqtar kóshirildi

ASTANA. QazAqparat - 2011 jyldan, «Jumyspen qamtýdyń jol kartasy - 2020» baǵdarlamasyn júzege asyrý bastalǵannan beri, ekonomıkalyq áleýeti tómen eldi mekenderden 17 myńnan astam azamat kóshirildi (5 myńǵa jýyq otbasy). Bul týraly QR Densaýlyq saqtaý jáne áleýmettik damý mınıstrliginen habarlady.

Atap aıtqanda, jańa mekenjaıǵa kóship kelgen azamattardyń ishinde 8,4 myń adam eńbekke jaramdy jasta, olardyń 6,5 myń nemese jalpy kórsetkishtiń 77,3  paıyzy jumyspen qamtyldy. Kóshirilgen barlyq otbasylary memleket esebinen tegin baspana aldy, 30 paıyzǵa  jýyq otbasy jeke turǵyn úılerde tursa, 70 paıyzy páterler nemese jataqhanadan bólmeler aldy. Jalpy alǵanda 1223 jeke turǵyn úı, 108 kóppáterli turǵyn úı jáne 12 jataqhana salyndy.

«Oblystar arasynda kóshirilgen adamdardyń basym bóligi Qaraǵandy oblysynda - 4 428 adam, Pavlodar jáne Shyǵys Qazaqstan oblystarynda sáıkesinshe 3 145 jáne 2 529 adam boldy», - delingen vedomstvo málimetinde.

Esterińizge sala keteıik, «JQJK - 2020» baǵdarlamasynyń úshinshi baǵyty jumys berýshiniń qajettiligi aıasynda oqytý jáne qonys aýdarý arqyly jumysqa ornalasýǵa járdemdesý bolyp tabylady. Belgili bolǵandaı, 2015 jyly ekonomıkalyq áleýeti tómen eldi mekenderden 1200-den astam adam kóshirildi.