JKO-nyń 90 paıyzy erejeni óreskel buzatyn júrgizýshilerdiń kinásinen oryn alýda

ASTANA. QazAqparat - QR Bas prokýratýrasy Quqyqtyq statıtıska jáne arnaıy esepke alý jónindegi komıtetiniń málimetine sáıkes, respýblıka boıynsha 2015 jyldyń 4 aıynda 2014 jyldyń osyndaı kezeńimen salystyrǵanda jol-kólik oqıǵasy 3 paıyzǵa tómendedi.

Elimizdiń joldarynda 5 136 jol-kólik oqıǵasy oryn alyp, onda 7 139 adam zardap shekken, al ótken jyldyń 4 aıynda 5311 jol-kólik oqıǵasy tirkelip, onda 7 186 adamnyń densaýlyǵyna zaqym kelgen.

Degenmen jol-kólik oqıǵasynyń saldarynan jaraqat alýshylardyń sany da bıyl birshama tómendegeni baıqalady.

Barlyq JKO-nyń 32 paıyzy Almaty qalasynda bolyp otyr,sonyń ózinde 2015 jyly osy qalada jol-kólik oqıǵalary azaıyp, 1 655-ti qurady. Apattylyǵy az Soltústik Qazaqstan bolyp otyr, onda 67 JKO oryn alǵan.

Aqmola, Qostanaı, Qaraǵandy 166 (198) oblystarynda JKO azaıǵan. Al Batys Qazaqstan men Qyzylorda oblystarynda JKO-nyń birshama ósýi baıqaldy.

JKO nátıjesinde jaraqat alǵandar sany boıynsha da Almaty qalasy aldyńǵy orynda, alaıda mundaǵy kórsetkish ótken jylmen salystyrǵanda tómendegen. Sondaı-aq, JKO saldarynan Aqmola, Qostanaı, Pavlodar oblystarynda jaraqat alǵan adamdardyń sany azaıyp keledi.

Statıstıka kórsetip otyrǵandaı, jol apattarynyń sebepteri ózgerissiz qalyp otyr. Burynǵysynsha JKO kóbinese nemese 90 paıyzy jol qozǵalysy erejelerin óreskel buzatyn júrgizýshilerdiń kinásinen oryn alýda. Máselen, júrgizýshilerdiń kinásinen 4 836 jol apaty bolǵan, onyń ishinde 139 júrgizýshi alkogolge masaıǵan nemese esirtkige eltigen kúıinde bolǵan.