Jitiqara turǵyny týystaryn aldap, olardyń atyna alty onlaın nesıe rásimdegen

QOSTANAI. QazAqparat – Jitiqara qalasynyń 36 jastaǵy turǵyny aldaý arqyly jarty mıllıonnan astam teńgeniń 6 onlaın nesıesin rásimdedi, dep habarlaıdy QazAqparat Qostanaı oblystyq polıtsııa departamentiniń baspasóz qyzmetine silteme jasap.

«Byltyr jyldyń sońynda Jitiqara aýdandyq polıtsııa bólimine ınternet alaıaqtyń qurbany bolǵan áıel shaǵymdandy. Jitiqara qalasynyń 41 jastaǵy turǵyny belgisiz bireý onyń jáne jubaıynyń atyna birneshe nesıe rásimdegenin baıandap berdi», - dep habarlady polıtsııadan.

Jedel-izdestirý is-sharalarynyń barysynda 36 jastaǵy er adam anyqtalǵan. Tergeýde belgili bolǵany, er adam týystarynyń úıine qonaqqa kelip, olar týraly málimet jınaǵan. Odan keıin Almaty qalasyndaǵy mıkronesıe uıymdarynyń birinen 6 onlaın nesıe rásimdegen.

Polıtsııa kúdiktini ustady. Qylmystyq is «Alaıaqtyq» baby boıynsha tergeldi. Sot sheshimimen alaıaq 4 jylǵa bas bostandyǵynan aıyrý jazasyna kesildi.