Jitiqara qalasyna zamanaýı medıtsınalyq kólikter jetkizildi
Qarasha aıynda Qostanaı oblysyna zamanaýı medıtsınalyq qurylǵylarmen jabdyqtalǵan 52 kólik ákelý josparlanǵan. Sonyń alǵashqy partııasy Jitiqara aýdanyna jóneltildi. Oblystyq jedel járdem stantsııasynyń bas dárigeri Irına Shteıgervaldtyń aıtýynsha, ár reanımobıldiń ishinde ottegimen toltyrylǵan 24 lıtrlik tórt ballon bar.
«Jitiqara qalasynan oblys ortalyǵyna deıingi araqashyqtyq 200 shaqyrymnan asady desek, reanımobıl ishindegi ottegi ballondary naýqasqa jetkilikti mólsherde toltyrylǵan. Osyndaı jańa zamanǵy medıtsınalyq kólikter shalǵaı aýyldardaǵy turǵyndarǵa der ýaqytynda kómek kórsetýge múmkindik beredi. Jańa kólikterdiń kelesi legi Lısakov qalasynyń feldsherlerine jetedi. Munan soń kezekte Arqalyq qalasy tur. Osylaısha, jedel járdem avtoparki birtindep jańartylady. Qazir oblystyq jedel járdem stantsııasy qajetti tehnıkamen qamtylǵan», - deıdi Irına Shteıgervald .
Jitiqaraǵa jetken reanımobıl birden jumysqa kirisip ketti. Jitiqara aýdandyq jedel járdem stantsııasynyń aǵa feldsheri Qalıma Jamanqulova aıtqandaı, jańa tehnıkalardyń múmkindikteri keń. 28 jyl boıy jergilikti jedel járdem stantsııasynda eńbek etip júrgen feldsherge reanımobıl ishindegi medıtsınalyq jabdyqtar tańsyq emes.
«Jitiqara avtoparkinde mundaı tehnıka buryn-sońdy bolmaǵan. Buǵan deıin eski «ÝAZ»-ben de júrdik. Reanımobılder kelgen soń aýrýhana úsh brıgadaǵa bólindi. Shaqyrtýlarǵa shyǵatyn feldsherler jańa qurylǵylardy tez meńgerip ketti», - deıdi tájirıbeli feldsher.
Jitiqaraǵa osy aptada taǵy bir reanımobıl jetkiziledi. Arnaıy kólikterde koronavırýstyń birinshi tolqynynda kezikken kemshilikter tolyq eskerilgen. Ókpeni jasandy jeldetý apparaty, defıbrılıatorlar, elektrli kardıografpen jaraqtandyrylǵan.