Jylýǵa jaýapty mınıstrler jınalystaryn qysqartyp, jylý ortalyqtaryn qadaǵalasyn – depýtat

<p>Jylý berý júıesine bólingen qarajattyń esebine qatań taldaý jasalyp, árbir jemqor qatań jazalanýy kerek. Bul týraly Májilistiń jalpy otyrysynda Erlan Saırov málim etti, dep habarlaıdy <a href="https://kaz.inform.kz/" target="_blank" rel="noopener">Kazinform</a>.</p>

«Prezıdent Qasym-Jomart Kemeluly Toqaev Úkimet aldynda elimizdiń turǵyndaryn jylýmen turaqty qamtamasyz etý boıynsha naqty tapsyrmalar berdi. Degenmen, birinshi aıaz túskende elimizdiń kommýnaldyq ınfraqurylymynyń syr bere bastaýy dástúrge aınalyp otyr. Ras, respýblıka boıynsha tozyǵy jetken jylý ortalyqtary men ınfraqurylym 80 paıyzdan asyp ketti. Al olardyń kóbin biz 50 jyldan astam ýaqyt paıdalanyp kelemiz. Bul - qaýipti jaǵdaı. Byltyrǵy Ekibastuz, Rıdder, Balhash, Kókshetaý, Qaraǵandy, Temirtaý, Petropavl qalalaryndaǵy apattar qordalanǵan máselelerdiń aıqyn kórinisi. Soǵan qaramastan, biz jylyna bul salada tek 5-7 paıyzǵa ǵana jańaryp otyrmyz. Bul tipti, eldegi eskirý úrdisiniń ornyn toltyrmaıdy. Olaı jalǵasa berse, jylý energetıkasyndaǵy kollaps ornaýy bek múmkin», - dedi E. Saırov Premer-Mınıstrdiń birinshi orynbasary Roman Sklıardyń atyna joldaǵan saýalynda.

Bul turǵyda ol byltyr ǵana jylý salasyndaǵy ınfraqurylymnyń tozýyn azaıtý maqsatynda arnaıy 160 mıllıard teńge qarjy bólinse de, saladaǵy problemalarǵa tótep berý qıynǵa túsip jatqanyn aıtty.

«Jyl basynda Parlamentte Joǵarǵy aýdıtorlyq palatasynyń «Jylýmen jabdyqtaý salasy» boıynsha qorytyndy esebinde 100-den asa naqty usynys pen júıeli syndar aıtyldy. Usynys retinde berildi. Biraq, sol usynystar boıynsha ne jaýap, ne atqarylǵan isti kórmedik. Osylaı tizip kete berýge bolady. Sondyqtan bul saladaǵy menedjment pen baqylaýdy kúsheıtýimiz kerek», - dedi depýtat.

Bul rette E. Saırov birqatar usynysyn jarııalady.

«Osy oraıda aldaǵy 3 aı qys ýaqytynda jaýapty mınıstrler jyly kabınetterinen shyǵyp, barlyq jınalystaryn qysqartyp, jylý ortalyqtarynyń bas-qasynda osyndaı aıazdy kúnderi júrýi kerek. Ekinshiden, 2022-2023 jyldary bólingen qarajattyń esebine qatań taldaý jasalýy tıis. Bul saladaǵy árbir jemqor qatań jazalanýy kerek. Úshinshiden, osy kúnderi óńirlerdegi jedel shtabtardyń jumysyn «eki eselengen 24/7 rejımine» kóshirý qajet. Tórtinshiden, ákimdikter men Úkimet osy saladaǵy óńirlik qaýipti zonalar boıynsha «Táýekel kartasyn» daıarlap, olar boıynsha naqty maqsatty algorıtm josparyn daıarlap qoıýy tıis», - dedi Erlan Saırov.