Jylý apatyna baılanysty Pavlodardaǵy lagerde demalyp jatqan 86 bala úılerine qaıtty

<p>PAVLODAR. KAZINFORM - &laquo;Baldáýren&raquo; balalar lagerinde demalyp jatqan oqýshylar jylý júıesindegi aqaýǵa baılanysty evakýatsııalandy. Qalalyq bilim berý bólimi ata-analarǵa aqshalaryn qaıtaryp beredi.</p>

Bul týraly Bala quqyqtary jónindegi óńirlik ýákil Sáýle Shákenova habarlady.

- Lagerdegi oqý korpýsy, medıtsınalyq ǵımarattyń ishi salqyn. Balalar jatatyn korpýstarda jylyraq, biraq balalardyń sózinshe ol túnde salqyndap ketedi. «Baldáýrende» budan da basqa máseleler bary anyqtaldy. Korpýstardyń ishinde boıaýdyń ıisi qatty seziledi. Al balalar jýynatyn jerde suıyq sabynnyń ornyna qatty sabyn qoıylǵan. Dıvan bir bólmede ǵana qoıylǵan, onyń ózi óte kóne, al ózge bólmelerde jerge tek kilem tóselgen. Onyń ústine bul jerde uıaly baılanys sapasy óte nashar, - deıdi óńirlik ombýdsmen. 

Belgili bolǵandaı, 7 jeltoqsan kúni tańerteń «Baldáýren» lagerindegi jylý jelisinen aqaý shyǵyp, jylý qysymy tómendep ketken. Bul jaǵdaı óńirlik tótenshe jaǵdaılar departamentinde tirkeldi. 

Pavlodar qalasynyń bilim berý bólimi lagerde demalǵan barlyq 86 bala búginde úılerine qaıtarylǵanyn málimdedi. Al ata-analaryna paıdalanylmaǵan kúnder úshin tólemaqynyń bir bóligi qaıtarylatyn boldy.

Eske sala keteıik, elimizde oqýshylardyń qysqy kanıkýly 10 kúnge sozylady.