Jylytý maýsymyn bastaýǵa qazandyqtar men týrbınalar daıyn — EM
«Jylytý maýsymyn bastaýǵa qazandyqtar men týrbınalar daıyn. Máselen, Pavlodar qalasynda áleýmettik nysandarǵa jylý berile bastady. Barlyq stansada 4,7 mln tonna kómir qory bar. Qor jınaýdyń 10 jáne 20 táýliktik normatıvi bar. Kómir óndiretin kenishter stansadan 200 shaqyrymnan jaqyn bolsa, onda 10 táýlikke, al odan alys bolsa 20 táýlikke jetetin qor bolýy kerek. Bul normatıvter jylytý maýsymy bastalǵannan bastap qoldanysta bolady. Qazirgi ýaqytta stansalardyń 90 paıyzynda qor jınalǵan. Eki-úsh mekemede bul jalǵasyp jatyr. Mazýtpen qamtamasyz etý máselesi de baqylaýda tur. Búginde 90 myń tonnadaı mazýt bar. Bizde mazýtpen jumys isteıtin stansa joq. Biraq, mazýt ot jaǵý úshin qajetti qosymsha otyn sanalady», - dedi vıtse-mınıstr.
Onyń atap ótýinshe, elimizde áleýmettik mazmýt uǵymy engizilgen. Máselen, mazýttyń naryqtaǵy 1 tonnasy 150 myń teńge bolsa, áleýmettik mazýttyń 1 tonnasy 115 myń teńge mólsherinde bekitilgen.
Aıta keterligi, júıelik operatordyń jóndeý kestesine sáıkes elektr stansalarynda bıyl 10 energoblokta, 55 qazandyqty jáne 45 týrbınany kúrdeli jóndeý josparlanǵan. 5 energoblokta, 30 qazandyqta, 26 týrbınada jóndeý jumystary aıaqtaldy. 4 energoblokta, 24 qazandyqta jáne 18 týrbınadaǵy jóndeý jumystary ár túrli kezeńderde júrgizilip jatyr.
Elektr jelileri boıynsha 20,8 myń shaqyrym elektr berý jelilerinde 422 kishi stansada, 4 054 taratý pýnkti men transformatorlyq kishi stansalarda kúrdeli jóndeý jumystary kózdelgen. 18,6 myń shaqyrym elektr berý jelileri men 351 kishi stansa men 3 851 taratý pýnkti men transformatorlyq kishi stansalarǵa jóndeý jumystary júrgizildi.