Jylyoı aýdanynda turatyn analar 5 sáýirden beri 42 sábıdi dúnıege ákeldi

<p>ATYRAÝ. KAZINFORM &ndash; Atyraý oblysynyń Qulsary qalasyn 5 sáýirde tasqyn sý basqan edi. Sodan beri Jylyoı aýdanynyń analary 42 sábıdi dúnıege ákelgen.</p>

Jylyoı aýdandyq ortalyq aýrýhanasynyń dırektory Asýlan Abdrahmanovtyń aıtýynsha, nárestelerdiń arasynda 20 ul, 22 qyz bar.

«Sý tasqynyna baılanysty sábılerdiń keıbiri Atyraý qalasynda, Mańǵystaý oblysynda dúnıege keldi. Al egiz náresteniń anasy Qulsary qalasynda bosandy. Bizdiń aýrýhana 18 sáýirde naýqastardy qabyldaı bastady. Qazir aýrýhanada 8 jas ana sábıimen jatyr. Nárestelerdiń de, analarynyń da jaǵdaıy qalypty», - dedi Asýlan Abdrahmanov.

Onyń deregine súıensek, qazir aýrýhananyń esebinde 1073 júkti áıel tur.

Eske sala ketelik, budan buryn Serik Shápkenov Qulsarydaǵy sý basqan aýmaqty tazartý mamyrǵa deıin aıaqtalatynyn aıtqan bolatyn.