Jylyoı aýdanynan kóshirilgen balalar sabaqty onlaın oqıdy

<p>ATYRAÝ. KAZINFORM &ndash; Atyraý oblysynyń Jylyoı aýdanynan evakýatsııalanǵan otbasylardyń balalary sabaqty onlaın oqıdy.</p>

Atyraý oblystyq jedel shtabtyń málimetine súıensek, Jylyoı aýdanynyń sý basqan eldi mekenderinen 31 009 turǵyn evakýatsııalanǵan. 

Bul týraly oblystyq bilim basqarmasy basshysynyń mindetin atqarýshy Sveta Amanshıeva málim etti. 

«Búginnen bastap Jylyoı aýdanynda qarǵyn sýdyń shekten tys tasýy saldarynan baspanasy sýǵa ketip, ózderi evakýatsııalanǵan otbasylardyń balalaryn qashyqtan oqytamyz. Bul Jylyoı aýdanyndaǵy jaǵdaı turaqtanǵanǵa deıin jalǵasady», - dedi Sveta Amanshıeva. 

Onlaın formatta bilim alatyndardyń qatarynda Qulsary qalasynan Teńiz ken ornyndaǵy vahtalyq kentke, Atyraý qalasyna evakýatsııalanǵandar otbasylardyń balalary bar.

Sondaı-aq, qashyqtan oqýǵa kórshiles oblystarǵa barǵan ata-analardyń balalary da tartylady. 

«Sý tasqynyna baılanysty turǵyndardyń bir toby Mańǵystaý oblysyna jetkizildi. Olardyń balalary sol óńirdiń bilim bólimi arqyly oqytylady» -dedi Sveta Amanshıeva. 

Eske sala ketelik, budan buryn Atyraý oblysynda tótenshe jaǵdaı jarııalanǵanyn jazǵan edik.

Sondaı-aq, Atyraý oblysynyń ákimi Serik Shápkenov turǵyndar ómirine qaýip tónse, aldyn ala habarlanatynyn aıtty.

Keıin Jaıyq ózeniniń sýy Atyraý qalasyna qaı tustan kirýi múmkin ekenin habarlaǵan bolatynbyz.