Jyldyq tabys 400 mlrd teńge: «Báıterek» holdınginiń basshysy Prezıdentke esep berdi

<p>ASTANA. KAZINFORM - Memleket basshysy &laquo;Báıterek&raquo; ulttyq basqarýshy holdıngi&raquo; AQ basqarma tóraǵasy Nurlan Baıbazarovty qabyldady, dep habarlaıdy Aqordanyń <a href="https://www.akorda.kz/kz/memleket-basshysy-bayterek-ulttyk-baskarushy-holdingi-ak-baskarma-toragasy-nurlan-baybazarovty-kabyldady-3103140" target="_blank" rel="noopener">baspasóz</a> qyzmeti.</p>

Qasym-Jomart Toqaevqa holdıngtiń 2023 jylǵy qyzmetiniń nátıjesi, sonyń ishinde kásipkerlik pen agroónerkásip keshenine qoldaý kórsetý, halyqty turǵyn úımen qamtamasyz etý jumystary jóninde esep berildi.

Prezıdentke byltyr holdıng aktıviniń ósimi 12 paıyz bolǵany týraly baıandaldy. Kompanııalar tobynyń ınvestıtsııalyq jáne kredıttik portfeli 10 paıyzǵa artqan. Al taza tabysy 7 paıyzǵa jetip, 400 mıllıard teńgeden asqan.

Nurlan Baıbazarovtyń aıtýynsha, ekonomıkanyń naqty sektoryn damytý sheńberinde «Báıterek» iri jobalar men lızıngtik mámilelerdi qarjylandyrý kórsetkishin 24 paıyzǵa, mıkro, shaǵyn jáne orta bıznestegi jobalardy qarjylandyrý josparyn 42 paıyzǵa asyra oryndady. Qazaqstannyń Damý banki men Ónerkásipti damytý qorynyń jelisi boıynsha 300 joba men lızıngtik mámile qarjylandyrylyp, 1,061 trıllıon teńge ıgerildi. Bul – rekordtyq kórsetkish. Agroónerkásip keshenine 554,7 mıllıard teńge ınvestıtsııa quıylyp, josparlanǵan kólemnen 11 paıyzǵa asty. Sondaı-aq 2023 jyly holdıngtiń enshiles kompanııalary arqyly qurǵaqshylyq pen ylǵaldyń shamadan tys bolýynan zardap shekken 1,1 myń fermerge 48 mıllıard teńge somasynda kómek kórsetildi.

Memleket basshysyna byltyr holdıng arqyly 2 mıllıon sharshy metrden astam turǵyn úı paıdalanýǵa berilgeni jóninde baıandaldy. Turǵyn úı sektoryna 317,6 mıllıard teńge ınvestıtsııa salynǵan. «Otbasy bank» aktsıonerlik qoǵamynyń ıpotekalyq baǵdarlamalary aıasynda jalpy somasy 1 trıllıon teńgeden astam qaryz berildi.

Kezdesýde holdıngtiń 2024 jylǵa arnalǵan bastamalary týraly aıtyldy. Onyń ishinde agroónerkásip kesheni jobalaryna 370 mıllıard teńge ınvestıtsııa quıý jáne 4 myńnan astam jańa jumys ornyn ashý, óńdeý ónerkásibin, týrıstik salany qarjylandyrý, qaldyqtardy qaıta óńdeıtin jáne suryptaıtyn zaýyttar salý, 9-20-25 turǵyn úı baǵdarlamasyn iske qosý sııaqty sharalar bar.

Qasym-Jomart Toqaevqa «Báıterek» holdınginiń bastamalaryn júzege asyrý nátıjesinde onyń el ekonomıkasyna qosatyn úlesi jyl sońyna qaraı 2022 jylmen salystyrǵanda eki ese artatyny jaıynda baıandaldy.

Memleket basshysy ekonomıkalyq ósim men halyqtyń turmys sapasyn jaqsartý úshin jańa baǵdarlamalardy iske qosý jáne keshendi tásilderdi qoldaný mańyzdy ekenin atap ótti. Sonymen qatar holdıngtiń ekonomıkany ártaraptandyrý jáne strategııalyq máni zor salalardy damytý baǵytyndaǵy jumysyn jandandyrý jóninde birqatar tapsyrma berdi.