Jylandydaǵy robototehnıka jarysy
«Aqyldy aýyl» degen kontseptsııa múldem atymen joq. Qarapaıym qala mektepterinde sandyq tehnologııany ıgerý, robototehnıkalyq zerthanalar bolýy múmkin. Al aýyl úshin onyń «aýyly» tym alys. Biraq Alakól aýdanyndaǵy Jylandy eldi mekeninde ornalasqan daryndy balalarǵa arnalǵan mamandandyrylǵan lıtseı-ınternaty talaı aýylǵa, onyń ishinde aýyl mektebine úlgi. Robot qurastyrý zerthanasy jasaqtalǵan mekteptiń Water 7 komandasy birneshe jyldan beri respýblıkalyq saıystarda oza shaýyp júr. Endigi maqsat – halyqaralyq arenaǵa shyǵý. Sol úshin «Zhulandy First Championship» respýblıkalyq týrnıri ótkizildi.
Atalmysh saıysqa elimizdiń men-men degen bilim ordalarynan 15 komanda qatysýǵa nıet bildirdi. Ustem foundation robototehnıkany damytý qorynyń dırektory Asylbek Murzahmetovtiń aıtýynsha, barlyq komanda «sen tur, men ataıyn» degen kil myqtylar. Biraq Jylandy quramasynan basqasy iri qalalardyń mektepterinen shyqqan komandalar. Qultemirler dodasynda sóz alǵan ZHERSU ınvestıtsııalyq-óndiristik korporatsııasynyń keńes tóraǵasy Baýyrjan Ospanov aýylsharýashylyǵynda maman tapshylyǵy aıqyn baıqalyp jatqanyn, jastardyń egin egý men mal baǵýǵa qulyq tanytpaıtynyn, bolashaqta osy máseleni robottardyń kómegimen sheshýge bolatynyn jetkizdi.
– Jylandy aýylyndaǵy daryndy balalarǵa arnalǵan mamandandyrylǵan lıtseı-ınternatynda robototehnıka zerthanasy jasaqtalǵan. Aýyldyń máselesin aýyl balasy ǵana biledi. Osy zerthanada biligin jetildirgen balalar saladaǵy kadr tapshylyǵyn sheshýde mańyzdy qadamdar jasaıdy. Olar bolashaqta salaǵa qajetti avtomattandyrylǵan tehnıkalar qurastyrady, – dedi ol.
Shara barysynda sóz alǵan oblys ákiminiń orynbasary Marlen Kólbaev respýblıka boıynsha qultemirler saıysy birinshi ret aýylda, onyń ishinde Jylandy aýylynda ótýi Jetisý óńiri úshin úlken jetistik ekenin alǵa tartty.
Dodada top jarǵan PID komandasy Nıderlandtaǵy Benelux chempıonatyna joldama jáne 400 myń teńge syıaqy enshilese, 2-orynǵa alǵan POINT komandasyna 300 myń teńge syıaqy, Úndistandaǵy FIRST Tech Challenge jarysyna joldama berildi. Al SEN komandasy 200 myń teńge syıaqyny qanjyǵasyna baılady. Jarysqa qatysýshylardyń bárine qarjylaı syı-syıapat kórsetildi.