Jyl sońynda ınflıatsııa 5%: Azyq-túlik baǵasy arzandaı ma

<p>ASTANA. KAZINORM &ndash; Ulttyq bank 2025 jyldyń sońy men 2026 jyldyń basynda ınflıatsııanyń 5 paıyzǵa deıin tómendeýin boljaıdy. Al el turǵyndary azyq-túlik baǵasynyń tómendeýin kútýi qajet pe? Bul saýalǵa Ulttyq bankten jaýap berdi.</p>

Ulttyq banktiń túsindirýinshe, ınflıatsııa tutynýshylyq taýarlar men qyzmetterdiń keń aıasyndaǵy baǵa ózgeristerin kórsetedi.

«Tutynýshylyq sebettegi bir taýarǵa nemese qyzmetke baǵanyń ósýi, ekinshisine tómendeýi, al úshinshisinde ózgerissiz qalýy múmkin. Inflıatsııa tutynýshylyq sebettegi barlyq taýar men qymetterdiń baǵa ózgerisin ortashalandyrady», - delingen Ulttyq banktiń agenttik saýalyna bergen jaýabynda.

Inflıatsııany esepteý úshin tutynýshylyq sebette Qazaqstannyń barlyq óńirindegi turǵyndar eń kóp tutynatyn 508 taýar men qyzmet qamtylǵan.

«Árbir Qazaqstan azamatynyń óziniń jeke tutynýshylyq sebeti bar. Onyń quramy talǵamǵa, ómir súrý saltyna, tabys deńgeıine, turǵylyqty jerine jáne basqalaryna baılanysty. Óz kezeginde baǵanyń bolmashy ári turaqty ósimi satyp alý múmkindigi men naryq turaqtylyǵyn qoldaıdy. Bul kompanııalarǵa uzaqmerzimdi jobalardy josparlaýǵa jáne júzege asyrýǵa, al turǵyndarǵa satyp alýdy josparlaýǵa jáne tabystaryn qunsyzdanýdan qaýiptenbeı jınaýǵa múmkindik beredi», - dep atap ótedi Ulttyq bankten.

Bolmashy jáne turaqty ınflıatsııa ekonomıkalyq aıqynsyzdyqty tómendetýge múmkindik berip, sol arqyly bıznestiń damýyna, óndiristik múmkindigin keńeıtýge septigin tıgizedi. Bul túptep kelgende uzaqmerzimi ınvestıtsııanyń ulǵaıýyna, ekonomıka men azamattardyń ál-aýqatynyń artýyna ákeledi.

«Óz kezeginde óte tómen ınflıatsııa nemese deflıatsııa – bul da táýekel. Óıtkeni, ony júzege asyrý tutynýshylar tarapynan suranystyń tómendeýine alyp keledi. Al óndirýshilerde bolashaqta qosymsha kiris alýǵa degen senimdiliktiń tómendeýi saldarynan ınvestıtsııa quıýǵa degen yntanyń quldyraýyna ákeledi», - dep naqtylaıdy UB-dan.