Jyl sońyna deıin Jetisýda 4 jańa mektep iske qosylady

<p>TALDYQORǴAN. KAZINFORM &ndash; Bıyl Jetisý oblysynda 2400 oryndy 5 mekteptiń qurylysy júrgizilýde, sonyń ishinde Kóksý, Aqsý, Alakól, Panfılov aýdandaryndaǵy tórt mekteptiń qurylysy jyl sońyna deıin aıaqtalady. Bul týraly Taldyqorǵanda ótken pedagogterdiń tamyz keńesinde Jetisý oblysynyń ákimi Beıbit Isabaev aıtty.</p>

— El Prezıdenti Qasym-Jomart Toqaev alǵashqy reformany bilim salasynan bastap, birinshi kezekte pedagog mamandardyń mártebesin kóterýge, muǵalimderdiń jalaqysyn arttyrýǵa erekshe nazar aýdardy. Bul rette oblysta osy salaǵa úlken qoldaý kórsetilip otyr. Bıyl oblysta bilim salasyn damytýǵa 186 mlrd. teńge bólindi, bul ótken jylmen salystyrǵanda 21,5 mlrd. teńgege kóp. Osy jyly 2400 oryndy 5 jańa mekteptiń qurylysy júrgizilýde, sonyń 2-eýi «Jaıly mektep» jobasy boıynsha salynyp jatyr, 4 mekteptiń qurylysy jyl sońyna deıin aıaqtalady, bir mektep 2025 jyly paıdalanýǵa beriledi dep josparlanǵan. Sondaı-aq, ulttyq joba aıasynda oblysta 4800 oryndy taǵy 5 mektep salý josparlanǵan, — dep atap ótti B. Isabaev baıandamasynda.

5 mektep Alakól aýdanynyń Úsharal qalasynda, Qaratal aýdany Úshtóbe qalasynda, Taldyqorǵannyń 3 shaǵyn aýdanynda turǵyzylady. Jalpy kelesi jyly salynatyn mektepterdiń sany — 6. Oǵan qosa byltyr materıaldyq-tehnıkalyq bazany nyǵaıtýǵa 2,9 mlrd. teńge bólingen. Ótken oqý jylynda jańa modıfıkatsııalyq úlgidegi 45 pán kabınetteri satyp alynsa, búgingi kúni josparlanǵan 78 kabınettiń 51-i ornatyldy. Sol sııaqty oqýlyqtar men oqý-ádistemelik quraldaryn satyp alýǵa 1,6 mlrd. teńge qarastyryldy.

Tamyz keńesine qatysqan Kóksý aýdany Qaratal aýylyndaǵy mektepke deıingi shaǵyn ortalyǵy bar Qaratal bastaýysh mektebiniń muǵalimi Naılıa Toqtabaeva óńirdegi bilim salasynyń ınfraqurylymyn damytý isine qatysty pikirin bildirdi:

— Qaratal bastaýysh mektebinde 14 jyldan beri jumys istep kelemin. Bizdiń mektep 1971 jyly salynǵan, ózi beıimdelgen ári tozǵan ǵımarat edi. Bıyl aýylymyzda 120 oryndy jańa mektep salynyp, paıdalanýǵa berilip otyr. Muǵalimder de, ata-analar men balalar da jańa oqý jylyn asyǵa kútip júrmiz. Endi biz zamanaýı quraldarmen jabdyqtalǵan jańa mektepte jumys isteımiz. Qalamen qatar aýyl mektepterine de erekshe kóńil bólinip jatqany qýantady. Muǵalimderdiń alańsyz jumys isteýine qolaıly jaǵdaı jasaý bilim sapasyn kóterýge tikeleı áser etedi, — dedi N. Toqtabaeva.

Atap ótsek, oblysta bilim sapasy 64,5% jetti. Túlekterdiń ulttyq biryńǵaı testileýdegi oblys boıynsha ortasha baly — 84,4.