Jyl sońyna deıin tsıfrlyq teńgedegi tranzaktsııa aınalymy 200 mlrd teńgeden asady – Bınur Jalenov
Spıkerdiń sózinshe, Qazaqstannyń qarjy naryǵy ulttyq ekonomıkany tsıfrlandyrýdyń basty qozǵaýshy kúshi.
«Biz qolma-qol aqshasyz tólem boıynsha álemde kóshbasshy elderdiń birimiz. Mobıldi bank qosymshalary kúndelikti qarjylyq qyzmetterdiń ǵana emes, sonymen qatar saýda-sattyq, memlekettik qyzmet alý jáne basqa da kóptegen qyzmetterdiń negizgi ınterfeısine aınalyp úlgerdi.Búgingi kúni Ulttyq bank ekonomıkanyń barlyq qolma-qol aqshasyz aınalymynyń shamamen 87%-yn óńdeıtin turaqty bankaralyq ınfraqurylym qurdy. Bizdiń sáıkestendirý derekterin almasý ortalyǵymyz qarjy ınstıtýttaryna qyzmetterdi qashyqtan, tsıfrlyq formatta usynýǵa kómektesedi. Munda aı saıyn shamamen 2,5 mln suranys óńdeledi»,- deıdi ol.
Sondaı-aq, ol tsıfrlyq teńge platformasy – memleket shyǵystarynyń ashyqtyǵyn qamtamasyz etýge, transshekaralyq esep aıyrysýlardy arzandatýǵa jáne jedeldetýge, sondaı-aq basqa da ınnovatsııalardy engizýge kómektesetin júıe ekenin atap ótti.
«Bıyl osy platformany alǵash ret tájirıbede synap kórdik. Sonyń biri – Ulttyq qordan bólinetin transfertterdiń óz maqsatynda paıdalanylýyn baqylaý. Aldaǵy kúnderi tsıfrlyq qosylǵan qun salyǵy (QQS) jobasy iske qosylady. Ol kásipkerlerge bıýdjetten salyqty qaıtarýdy jedeldetýge múmkindik beredi. Biz jyldyń aıaǵyna deıin tsıfrlyq teńgedegi tranzaktsııa aınalymy 200 mlrd teńgeden asady dep boljap otyrmyz. Al 2025 jyly platforma iske qosyla bastaıdy»,- dedi ol.
Aıta keteıik, Qazaqstanda tsıfrlyq teńgeni 2025 jyldyń sońyna deıin tolyqtaı engizý josparlanyp otyr.
Pılottyq jobaǵa 4 bank qatysyp jatyr. Jalpy tólem júıesimen Ulttyq tólem korporatsııasy aınalysady.