Jyl sońyna deıin 27 stýdentter jataqhanasy paıdalanýǵa beriledi

<p>ASTANA. KAZINFORM &ndash; Jyl sońyna deıin elimizde 10 576 oryndyq stýdentterge arnalǵan 27 jataqhanany paıdalanýǵa berý josparlanyp otyr. Bul týraly Ǵylym jáne joǵary bilim mınıstrligi joǵary oqý ornynan keıingi bilim komıteti tóraǵasynyń orynbasary Aqerke Abylaıhan málim etti.</p>

Ǵylym jáne joǵary bilimdi damytýdyń 2023-2029 jyldarǵa arnalǵan tujyrymdamasy sheńberinde jyl saıyn 10 myń oryndyq jataqhanamen qamtý josparlanyp otyr.

«Búginde 4650 oryndyq 17 jataqhana iske qosyldy. Atap aıtqanda, Túrkistan oblysynda 370 oryndyq 3 jataqhana, Jambyl oblysynda 100 oryndyq jataqhana, Atyraý oblysynda 490 oryndyq jataqhana, Pavlodar oblysynda 189 oryndyq jataqhana, Almatyda 1040 oryndyq 4 jataqhana, Shymkentte 930 oryndyq 3 jataqhana, Astanada 3 jataqhana 1207 oryndyq, Qostanaıda 324 oryndyq jataqhana bar», - dedi Aqerke Abylaıhan OKQ-de ótken baspasóz máslıhatynda.

Sondaı-aq, mınıstrlik ókili jataqhanamen qamtýda aldymen áleýmettik osal topqa jatatyn jáne birinshi kýrs stýdentterine basymdyq beriletinin atap ótti.

«Stýdentterdi jataqhanamen qamtamasyz etý úshin joǵary oqý oryndarynyń jaýapkershiligi kúsheıtildi. 2024 jyly mınıstrlik jataqhanaǵa muqtaj stýdentterdi tolyqqandy qamtamasyz etý jáne turý úshin jaǵdaı jasaý bóliginde joǵary oqý oryndarynyń bilim berý qyzmetine qoıylatyn talaptardy qaıta qarady», - deıdi ol.

Qazir JOO-nyń 93 367 tósek-oryndyq 264 jeke jataqhanasy bar. Tapshylyqty joıý úshin jeke stýdenttik jataqhanalar men sharttardy qosa alǵanda, hostelderdi jalǵa alý praktıkasy iske qosylǵan. Bul baǵyttaǵy jumys tamyz aıynyń sońyna deıin jalǵasady.

Aıta keteıik, jýyrda Astanada 400 orynǵa arnalǵan taǵy bir jataqhana ashyldy.