Jyl saıyn 100 mln gektar shuraıly jer jaramsyz terrıtorııaǵa aınalady
Aýqymdy sharaǵa 196 elden 500-ge jýyq delegat qatysyp jatyr. Aıta keteıik, bul – Shóleıttenýmen kúres konventsııasyna qol qoıǵan elderdiń alǵashqy kezdesýi.
Sessııada sóz alǵan Ózbekstan Respýblıkasy Olıı Májilisi Senatynyń tóraǵasy Tanzıla Narbaeva Prezıdent Shavkat Mırzıeevtiń otyrys qatysýshylaryna arnaǵan hatyn oqyp berdi.
«Ózbekstan jáne tutastaı alǵanda Ortalyq Azııanyń búkil óńirleri klımattyq ózgeristiń asa aýyr zardabyn tartyp otyr. Shańdy daýyldardyń geografııasy keńeıip, aýa men jerdiń sapasy aıtarlyqtaı nasharlap, sý qory azaıdy, flora men faýnanyń erekshe túrleri joǵaldy. Búgin biz bútin bir urpaqtyń kóz aldynda joıylyp bara jatqan Aral teńizi jahandyq apatynyń aýyr saldarymen kúresip kelemiz. Osy qaýipter jáne ózge de kóptegen faktorlar bizdiń óńirdiń ǵana emes, búkil álem halqynyń ál-aýqaty men densaýlyǵyna tikeleı áser etedi. Sondyqtan ornyqty damýdy qamtamasyz etý úshin birlese kúsh jumsap, áriptestikti nyǵaıtý qajet», - delingen Shavkat Mırzıeevtiń forým qatysýshylaryna arnaǵan hatynda.
Sondaı-aq, forýmǵa qatystqan BUU-nyń Shóleıttenýmen kúres jónindegi konventsııasynyń atqarýshy hatshysy Ibragım Tıaý 2015 jyldan beri 4 mln sharshy shaqyrym shuraıly jer jaramsyz terrıtorııaǵa aınalǵanyn aıtty.
«Búkil álemde qurǵaqshylyq, dala órtteri jáne jahandyq jylyný deńgeıiniń kúrt artqanyn baıqap otyrmyz. 2015 jyldan bastap shamamen 4 mln sharshy shaqyrym saý ári shuraıly jer jaramsyz bolyp qaldy. Mysal úshin, bul aýmaq Ortalyq Azııanyń alyp jatqan terrıtorııasyna teń. Jyl saıynǵy shyǵyn - shamamen 100 mln gektar. Sondyqtan qazirgi tendentsııalardy saqtaı otyryp, 2030 jylǵa qaraı 1,5 mlrd gektar jerdi qalpyna keltirý qajet bolady», - dep málim etti Ibragım Tıaý.
Ózbekstannyń Ekologııa, qorshaǵan ortany qorǵaý jáne klımattyń ózgerýi mınıstri Azız Abdýhakımov bolsa jerdiń shóleıttenýin toqtatý jumysy nátıje bere bastaǵanyn sóz etti.
«Klımattyń ózgerýi men adamı faktordan bolǵan teris saldar tabıǵatqa janashyrlyqpen qaraý qajettigin uǵyndyryp otyr. Qorshaǵan ortany qorǵaý - Ózbekstan úkimetiniń basty strategııalyq basymdyqtarynyń biri sanalatynyn atap ótkim keledi. Biz jer degradatsııasyn toqtatýǵa tyrysyp jatyrmyz jáne alǵashqy nátıje de jaman emes», – dedi Azız Abdýhakımov.
Aıta ketsek, BUU-nyń Shóleıttenýge qarsy konventsııasy qýańshylyq, jer degradatsııasy jáne qurǵaqshylyqpen birlese kúresý úshin qabyldanǵan.
Ol 196 eldi qamtıdy.
Konventsııa 1994 jyly 17 maýsymda Parıjde ótken BUU Qorshaǵan orta jáne damý konferentsııasynyń nátıjesinde qabyldanǵan.