Jyl qorytyndysy: Medıtsına salasynda qandaı jetistikter boldy
360 myńnan astam sábı dúnıege keldi
Búgingi tańda elimizde densaýlyq saqtaý júıesinde 78 myńnan astam dáriger jáne 180 myńǵa jýyq orta medıtsına qyzmetkerleri jumys isteıdi. 2023 jyldyń 11 aıynda statsıonarda shamamen 3 mln adamǵa kómek kórsetildi. Alǵashqy medıtsınalyq-sanıtarlyq kómek jelisi 90 mıllıonnan astam kelýshilerdi qabyldady. Jedel medıtsınalyq járdem kúshteri 8 mln shaqyrtý boıynsha kómek kórsetti.
Sondaı-aq, bıylǵy 10 aıda 2022 jyldyń sáıkes kezeńimen salystyrǵanda halyqtyń jalpy ólim-jitimi 5,7%-ǵa, qan aınalymy júıesi aýrýlarynan– 6,9%-ǵa, qaterli isikterden – 0,6%-ǵa, jaraqattardan, jazataıym oqıǵalardan jáne ýlanýdan – 4,2%-ǵa, týberkýlezden – 22,1%-ǵa, tynys alý organdary aýrýlarynan ólim-jitim – 4,7%-ǵa tómendegenin atap ótti.
Jyl basynan beri 10 aıynda náreste ólimi 9,6%-ǵa, ana ólimi 24,4%-ǵa tómendedi. Sondaı-aq, bıyl halyq sany 20 mıllıonǵa jetti. Jyl saıyn 400 myńnan astam júkti áıel ambýlatorııalyq qyzmet mamandarynda baıqalady jáne bir táýlikte elde 1000-ǵa jýyq náreste dúnıege keledi. Qazirgi ýaqytta 360 myńnan astam náreste dúnıege keldi.
Júkti jáne jańa týǵan náresteler densaýlyǵyn saqtaý men patologııalaryn erte anyqtaý úshin 11 mln-nan astam balaǵa skrınıngter júrgiziledi.
Qazaqstan – Ortalyq Azııada týǵannan bastap kardıohırýrgııalyq operatsııalar júrgiziletin jalǵyz memleket. Týa bitken júrek aqaýy bar balalarǵa 1 732 ashyq júrek operatsııasy jasaldy, onyń 75%-y bir jasqa deıingi balalarǵa jasaldy.
Alǵashqy medıtsınalyq kómek kórsetý sany artty
Elimizde medıtsınalyq-sanıtarııalyq alǵashqy kómek uıymdarynda 110 myńnan astam adam, onyń ishinde 34 195 dáriger jáne 75 852 orta býyn qyzmetkerleri jumys isteıdi. Halyqtyń MSAK qyzmetine qaralý sanynyń ósýi medıtsınaǵa degen seniminiń artqanyn kórsetedi.
Bıylǵy 11 324 mln konsýltatsııalyq-dıagnostıkalyq qyzmet nemese bir turǵynǵa shaqqanda 16-dan astam qyzmet kórsetildi. Al 9 aıda 2,8 mln eresek halyq (onyń ishinde 1,1 mln aýyl halqy) ckrınıngtik tekserýlermen qamtamasyz etildi.
«Nátıjesinde 388 myń adamda aýrý anyqtalyp, 220 myń adam dıspanserlik esepke alynǵan. Qashyqtan kórsetiletin medıtsınalyq qyzmetter sany 6,7 esege artyp, 688 myń qyzmetke jetti. Ambýlatorııalyq deńgeıde ońaltý qyzmetteriniń 200-ge jýyq ataýy kórsetiledi, 211 myńǵa jýyq patsıent medıtsınalyq ońaltý aldy», - dep jazylǵan mınıstrlik jaýabynda.
Sondaı-aq, 2019 jyldan bastap ambýlatorııalyq dári-dármekpen qamtamasyz etýge bólingen qarajat kólemi 2 eseden astam ulǵaıdy jáne 237 mlrd teńgege jetti.
Bıyl jedel járdem qyzmetine 7,6 mln shaqyrtý tústi, brıgadalar kún saıyn orta eseppen 24 myń shaqyrtýǵa qyzmet kórsetedi. Shalǵaı eldimekende shuǵyl medıtsınalyq kómekti qamtamasyz etý úshin medıtsınalyq avıatsııa qyzmeti jumys isteıdi. Olar 2023 jyly 2 myńǵa jýyq ushý jasaldy: 1578 – óńirlik deńgeıde, 435-i Astana qalasynan jáne 7-i halyqaralyq deńgeıde. 6 myńǵa jýyq patsıentke 7 myńǵa jýyq medıtsınalyq qyzmet kórsetildi.
Mıllıonnan astam aýyl turǵyny tekserildi
Elimizde aýyl turǵyndary úshin keńeıtilgen skrınıng engizildi, onda búırek, asqazan-ishek joldary, tynys alý aǵzalary, qýyqasty obyry aýrýlaryn erte anyqtaýǵa medıtsınalyq qyzmetter qamtylǵan.
«Jyl basynan beri 1,1 mln aýyl halqy profılaktıkalyq tekserýlermen qamtyldy jáne 62 myń naýqas anyqtaldy. Bastapqy medıtsınalyq keshen qyzmetteri 1,7 mln aýyl turǵynyna usynyldy: onyń ishinde 1,4 mln konsýltatsııa berilip, 107 myń naýqas anyqtaldy. Bul rette 690 myń dıagnostıkalyq jáne 465 myń zerthanalyq zertteý júrgizildi», - deıdi Densaýlyq saqtaý mınıstrligi.
Sonymen birge, medıtsınalyq poıyzdar 121 stantsııany aralap, 88 myńnan astam adamǵa medıtsınalyq qyzmet kórsetti, onyń ishinde – 19 myń 222 bala bar. Osy jobanyń arqasynda shalǵaı aýyl turǵyndary medıtsınalyq kómekke jáne aýrýdyń erte satysynda patologııany anyqtaýǵa qol jetkizdi.
Dárilik zattar men medıtsınalyq buıymdar qoljetimdiligi úshin aýylda medıtsınalyq uıymdar bazasynda 72 dárihana pýnkti jáne 161 jeke dárihana ashyldy.
Aýyldarda 50 adamǵa deıin medıtsınalyq kómek kórsetiletin densaýlyq saqtaý uıymdary jelisiniń memlekettik normatıvi qaıta qaraldy, 500-den astam adamy bar aýyldarda orta medıtsınalyq personal sany 3-ke deıin ulǵaıtyldy.
«Aýyldyq densaýlyq saqtaýdy jańǵyrtý» ulttyq jobasy sheńberinde 40 medıtsınalyq-sanıtarııalyq alǵashqy kómek ortalyǵy salynýda, 59 nysan qurylysy aıaqtaldy. Sonymen qatar, 4 kópbeıindi aýdandyq ortalyq aýrýhanany kúrdeli jóndeý jáne rekonstrýktsııalaý júrgizilýde.
Emdeý men otanyń jańa tásilderi engizildi
Respýblıka boıynsha 19 myńnan astam dáriger men 56 myń meıirger halyqqa statsıonarlyq kómek kórsetedi. Aýrýhanalarda 2,7 mln patsıentke kómek kórsetilip, 740 myńnan astam naýqasqa ota jasaldy.
Elimizde transplantologııa, kardıohırýrgııa, onkologııa, ınnovatsııalyq jasýshalyq tehnologııalar salasynda 80 jańa tehnologııa engizildi, olar arqyly 20 myńǵa jýyq adam emdeldi, 259 aǵza transplantattaldy.
Ulttyq neırohırýrgııa ortalyǵynda ashylǵan sátten bastap gamma-pyshaq apparatymen 1133 operatsııa jasaldy, bıyl – 233 operatsııa jasaldy. Qalqansha beziniń obyry boıynsha 1300-den astam naýqas radıoıodterapııamen emdeldi.
Súıek onkopatologııasy kezinde ınnovatsııalyq 3D protezdeý engizildi (15 ota).
Beıneendoskopııalyq jabdyqty hımıoterapııamen ushtastyra otyryp, shamamen 30 myń onkologııalyq operatsııa oryndalady.
Jyl saıyn 12 myńnan astam patsıent sáýlelik terapııa alady (tomoterapııa, stereotaksıs, IMRT, IGRT).
«Kardıohırýrgııalyq ortalyq 2011 jyldan bastap júrektiń jasandy sol jaq qarynshasyna 492 ımplantattaý júrgizdi, 2023 jyldyń 10 aıynda – 40 operatsııa jasady. Respýblıkada 79 ınsýlt ortalyǵy jumys isteıdi, olar 38 myńnan astam adamǵa kómek kórsetken. 44 koronarlyq aralasý ortalyǵy jiti koronarlyq sındrom kezinde el halqyna mamandandyrylǵan medıtsınalyq kómek kórsetedi, onda 33 myń patsıent em aldy», - deıdi mınıstrlik.
Statsıonarlyq kómek sheńberinde shamamen 200 mlrd teńgege dári-dármekter men medıtsınalyq buıymdar satyp alyndy.